كيچيك باله لرنينگ سريال كوريشلری اولرنینگ تعلیم کوریشلریگه قندی تاثیر قویه دی؟

سونگي ييللرده خصوصي تلويزويون لر فعاليت گه باشله شي بيلن نه فقط كته ياشلي كيشي لرسرياللرگه قيزيقيب قالماقده لر بلكه كيچيك ياشلي باله لرهم سرياللرني كوريشيگه قيزيقيشي آشيب بارياتگني كوزه تيله دي.

مملكت ده خذمت كورسه تيب كيله ياتگن عاموي خبر واسطه لريده ييترليچه باله لراوچون مخصوص برنامه لر بولمسليگي همده عايله لرده گي ياش كته لرباله لراشتياقي گه كوپراق اعتبار بيرمسليك لري بوقتلم ني سريال كوريشگه مجبورلنتيرگني تيل گه آلينماقده.

بوخصوصده سميع الله:" مين كارتون برنامه سيني كوره من، اما آنم وآتم لرسريال ني قوي دييديلر، مجبورقاليب سريال تماشا قيله من، يوقسه كارتون برنامه لريني كوريشگه قيزيقه من، مينگه باله لراوچون برنامه لرنشرايتيلسه يخشي، دايم بوني ايسته يمن." دييدي او

بيرقطارياشلرهم بارسرياللرني كوريش گه آزراق اعتبار بيره ديلرامابو كبي ياشلرني يكه يريم اوچره ته سيز.

خال محمد بيشينچي صنف اوقووچيسي:" تلويزيون تماشا قيله من اما كوپ وقت بو بيلن بوليب قالمه يمن چون درسلريم بار اوقيتووچيلريم پس سباق لريمني سوره يديلراوقيشيم كيره ك"

ايريم لرگه كوره باله لرذاتا اوزلريگه تيگيشلي مخصوص برنامه لرگه قيزيقسه لرهم عايله باشليغ لري سريالرني تماشا قيليب كونگيل قوييشي ايسه باله لرگه هم اوز تاثيريني تشله گن.

معارف ده اوزاق ييللرايشله گن غفور خان حكيمي باله لرسرياللرگه كونگيل قوييشي تعليم لري گه سلبي تاثيرقوييشيدن تشويش بيلديرسه هم بومعمانينگ آلديني آليشگه حتي اوزي هم قينه له ياتگن ليگي ني تيل گه آله دي.

عايله باشليغ لريگه كوره باله لري تونده تماشا قيلگن سرياللر تكراريني هم كوندوزكوني تماشا قيليشگه قيزيقه ديلر.

عايله لرنينگ سواد سيزليگي وعايله باشليغ لري تمانيدن عايله ايشلري ترتيب گه سالينمي يخشي باشقريلسمليگي سبب باله لرتلويزيون تماشا قيليش بيلن بند بوليب تعليم دن اوزاق قاليش لري يمان عاقبت لرني آليب كيله دي ديگن تشويش بيلديريلماقده .

بوحقده ميمنه شهريده گي رشاد باله لرخصوصي باغچه سي يا كودكستان مسوولي رشيدرشاد

" باله لراوچون مخصوص اتاق يوق بيزاولرني اوزخانه لريده قوييب اوزمشغولات لري بيلن بند قيلسك، حتي اوزبالم توركي سرياللرني كوريشيگه قيزيقه دي" دييدي او

بيرقنچه لرگه كوره باله لرتلويزيون تماشا قيليشي ضرور، اما ساعت لب بوبيلن بوليب قاليش ني كيله جكده بيليملري ني آشيره آلمسليگي گه سبب بوليشيدن تشويش بيلديريلماقده