ميمنه ده مينگلب اهالي و مكتب اوقووچيلري شهرنينگ تازه لش اوچون عمومي حشرگه قتنشگن

اطراف محيط تازه له نيب آدم لرسلامت ليگي اوچون اطراف محيط ني تازه سقلش رياستي تشبثي بيلن يولگه قوييلگن بوعمومي حشرده فارياب ولايتي نينگ بير قطار رسمي لري، مكتب اوقووچيلري، اوقيتووچيلر، دولت خادملري واهالي دن عبارت بولگن ايدي.

عمومي حشرگه قتنشگن لرشهرگه تيگشلي جاده لر، مكتب لر ايچكريسي، كسلخانه ومسجدلرميداني تازه لشگن لر.

اطراف محيط ني تازه سقلش اداره سي گه كوره عمومي حشرني يولگه تشلشدن مقصد اطراف محيط دايم تازه له نيب توريشي اهالي گه بير مدينت گه ايله نيشي بولگن.

عين حالده فارياب ولايتي نينگ ساغليق ني سقلش اطراف محيط ني تازه سقلش بوييچه مسوولي داكتراميد الله عظيم هم بونده ي تازه لش ايشي يولگه قوييليشي اهالي سلامت ليگي اوچون مهم ايكن ليگي ني معلوم قيلدي.

فارياب مدني جماعه چيليك ترماقي نينگ مسووللري هم اهالي ني اوزاطراف محيط لريني تازه سقلش گه چقيريب بوكبي عمومي حشرلر آيده بيرمرته يولگه قوييليشيدن خبر بيره ديلر.

اطراف محيط ني تازه سقلش اوچون حشرايشي گه چقيريلگن لراوزمحيط لري چقينديلردن تازه له نيب تازه محيط گه ايله نيشي دن خرسند ليك بيلديريب كيله جكده شونگه اوخشش عمومي ايشلرگه قتنه شيش لريدن سوزبيريب اوزلري يشب كيله ياتگن اوي وكوچلريني هم تازه سقلش گه اعتبار قره تيش لري ني تيل گه آلگن.

سونگي ييللرده مملكت نينگ ييريك شهري لري ده اطراف محيط وضعيتي يمان له شيب باره ياتگن ليگي ايسه نه فقط بو ساحه ده گي متخصص لرني تشويش لنتيرگن بلكه مملكت رسمي لريني هم تشويش لريگه سبب بوليب كيره كلي چاره تدبيرآلينيشي باره سيده بويورغ بيرگن لري گه گواه بوليب كيلماقده ميز.

بيرقطارلرگه كوره اطراف محيط تازه سقله نيشي ايسه بير كون ليك عمومي حشرلرگه چيكله نيب قالمي بلكه اهالي ني اطراف محيط تازه سقلش اوچون اعتبارقره تيش لريگه عاموي خبر واسطه لري، دين عالم لري وسيمينارلريولگه قوييليشي بيلن معلومات لريني آشيريش مهم ديب تاكيدلنه دي.