اداری اصلاحات کمیسیونی و پارلمان آره سیده گی قرمه قرشی فکر لر چقورلشگن

افغانستان اداری اصلاحات و ملکی خذمت لر کمیسیونی، اولوسی جرگه تمانیدن مذکور اداره گه فساد موجود لیگی و دولتی ایشلاوچیلرنینگ شخصی علاقه لر اساسیده ایشگه آله یاتگنی ادعا لرنی رد قیلگن.

تیناون افغانستان اولوسی جرگه سی نینگ بیر قنچه اعضالری اداری اصلاحات اداره سی تمانیدن اوچ یریم ملیارد دالر صرفلنگنی نی ایتیب، بو اداره بیکار ایتیلیشی نی سوره گن ایدی.

اداری اصلاحات و ملکی خذمت لر کمیسیونی نینگ مسووللریگه کوره، مذکور اداره افغانستان باش قانونی اساسیده جمهور رییس تمانیدن ایجاد ایتیلیب، جمهور رییس دن تشقری هیچ بیر ارگان اوشبو اداره نی بیکار ایتیش صلاحیتی گه ایگه ایمس.

مذکور کمیسیون باشلیغ لریدن محمد نادر هوتک بی بی سی بیلن بولگن صحبتی ده مذکور ادعالرنی رد ایتگن.

" بیرینچی دن اوچ یریم ملیارد دالر انچه کوپ پول بوله دی. بیزنی اداره میز اوتگن اون بیر ییل ایچیده بو مقدار پول صرفلنمه گن. اداری اصلاحات و ملکی خذمت لر کمیسیونی شونده ی بیر اداره که باشقه اداره لردن کوره مصرفی کوپ آز. ایککینچی مسئله بو دیر که اولر بیزنی کمیسیونی میزگه فساد بارلیگی نی ایتگن لر. ایتیشیم کیره ک کی بیز بو ادعالرنی رد قیله میز."

اداری اصلاحات کمیسیونی افغانستان نینگ وقتینچه لیک حکومتی توزه لیشی دن آلدین بن انجمنیده افغانستان ده یخشی بیر حکومت اورنه تیش مقصدی بیلن ایجاد ایتیلگن ایدی. اما ایندی بیر قنچه ملت وکیل لر گه کوره اوزمان دولت چوکاتیده پارلمان بولمه گنی اوچون حاضر مذکور قوه، اوشبو کمیسیون نینگ سوال آستیده کیلتیریشی ممکنلیگی نی ایته دیلر.

ملت وکیل لردن سید عالمی بلخی اولوسی جرگه ده بونده ی سوز یوریتگن:

" بن اجلاسی نینگ فیصله سی زمان اوتیشی بیلن محدود بولگن. یعنی پارلمان ایجاد بولمه گنی گه قدر. شو اوچون، جناب رییس بونده ی حرکت قیلیشی میز ممکن سیز بوله دی. بو مسئله توغری سیده چقور راق فکر قیلیشیمیز کیره ک. بیز ملکی خذمت لر و اداری اصلاحات نینگ تورت قانونی گه اوزگریش کیلتیریشیمیز کیره ک. شو عملگه آشیشی بیلن کمیسیون اوزی دن اوزی اورته دن کیته دی."

شونده ی بیرحالده اداری اصلاحات کمیسیونی باشلیغ لری، بو کبی سوزلرنی حکومت نینگ اپوزیسیونی گه نسبت بیریب، ملت وکیل لرنینگ طلب لری بو کمیسیون تمانیدن عملگه آشیریلمه گنی باعث، بو کبی ادعا لرنی یولگه قویگن لر دیب اورغوله یدیلر. باشقه تماندن ینه باشقه بیر قنچه ملت وکیل لر اداری اصلاحات کمیسیونیده اوزگریش کیلیشیگه طرفدار بولسه ده بیراق، مذکور کمیسیون اورته دن کیتیشگه قرشیلیک بیلدیرگن لر.