مزارشريفده پاكستان مالي ياردمي بيلن ينگي بيليم يورت ايجاد ايتيلگن

مزارشريف شهريده پاكستان حكومتي نينگ مالي ياردمي بيلن ايجاد ايتيلگن ينگي بيليم يورت نينگ آچيليش مراسمي بولي اوتدي. بيليم يورت توزه ليشي اوچون اون سكيز ميليون دالر مبلغ مصرفگه ييتگنليگي ايتيله دي. بلخ ولايت حاكمي عطامحمد نورنينگ هم بو يولده كورستگن مالي ياردمي انچه گينه ايكنليگي ايتيله دي. مذكور بيليم يورتده اون اوچ مينگ طلبه نينگ درس آليشي كوتيلماقده.

بو پاكستان تمانيدن فرهنگي بوليملرده كورسه تيله ياتگن همكارليكلرنينگ بيرينچي مثالي ايمس. بوندن بورون هم مذكور اولكه تمانيدن باشكينت كابلده گوزه ل صنعتلر فاكولته سي، ننگرهارده گي ساينس فاكولته سي بولرگه مثال بوله آله دي.

پاكستان و افغانستان ارا، هيچ قنده ي سياسي فكر و مناظره كوزگه توتيلمه ي، مدنيت ساحه سيده علاقه لرنينگ باغله نيشي بو ايككي حكومت نينگ موجود مناسبتلريني ينه- ده كوچه يتيريشيگه ايشانه دي امان الله مونس، مزارشريفده گي وترنري فاكولته سينينگ باشليغي.

جناب خالد علمي افغانستان شمالي حدودي نينگ تشقي ايشلر رهبريگه كوره، افغانستان و پاكستان نينگ سياسي چهره لري دايم هم جدي و كيسكين سياسي حركتلر اوچون كوره شيب كيلمه گن. اونينگچه بو كبي ينگي قوريليش ايشلري اورته ده گي مناسبتلر اوچون دوستانه يول بوليشگه كوپراق حصه قوشه دي.

بولردن تشقري، اوشبو بيليم يورت نينگ شهردن بير قدر اوزاقليگي ايسه، ايريم طلبه لر اوچون معما هم حسابلنه دي.

بلخ بيليم يورتي نينگ باش رهبري مكمل الكوزي جنابلري ينگي قوريلگن بيليم يورت نينگ تمل تاشي 1382 ييلده قوييليب، نهايت 1389 ييلده كامل بولگنيني ايتدي.

«اصليده بو عمارت دييرلي تورت مينگ طلبه نينگ درس آليشي اوچون مولجللنگن ايدي. بونينگ اوزي اولگي بيليم يورتيميزده گي يريم قيينچيليگي نينگ حل بوليشيگه حصه قوشدي. حاضر بو يونيورسيتيتگه انجيرليك، كمپيوتر- ساينس و زارعت فاكولته لريني كوچيريشگه حركت قيله ميز. بيز بو ييل ينگي درسي جريان اوچون اون اوچ مينگ اوقووچي قبول قيلديك. كيله سي ييل ايسه بوندن زياده طالب علم قبول قيليشيميز ممكن، بلكه بو نكته ني يوزده- يوز كوزگه توته ميز. چونكه صنفلرنينگ كمليگي و درسي محتوالرنينگ قويي درجه ده ايكنليگي بو ييرده اوقيب يورگن طلبه لرگه آزمونچه معما يره تمس ايدي. بونينگ يانيده بيزنينگ اولگي اوقوو يورتيميز درحقيقت مزارشريف نينگ تخنيكم انستيتوتيگه تيگيشلي ايدي. كيلگوسي ييل ايسه،‌ بيز منه بو ينگي اوقوو درگاهيگه يخشيلب جايلشيب آلگنيميزده فاكولته لريميزنينگ هم ساني كوپيشيگه اميد بيلديره من.»

بيليم و مدنيت اوچون يولگه قوييله ياتگن بو كبي خط- حركتلرنينگ كوپه ييشي ياش قتلم نينگ بيليم آليشي اوچون اينگ عالي زمينه بوليشيني تاكيدله دي يوقاري تحصلات وزيري جناب عبيدالله عبيد. اوشبو يونيورسيتيتگه علاوه شمالي مزارشريف ده ينه اوچته فاكولته نينگ تهداب تاشي هم يقينده قوييليشي خبر قيليندي.