لوگرولایتی ده بیر ییلده اوچ والی تعیین ایتیلگن

لوگر ولایتی کابل نینگ جنوبیده جایلشگن، بوشهردن قریب 50 کیلومتر اوزاقلیکده افغانستان نینگ نسبتن ناتینچ ولایت لریدن حسابلنه دی.

بو ولایت کابل امنیتی اوچون مهم بولگن لیگی وبیر ییل جریانیده اوچ حاکم برطرف ایتیلیب تعیین له نیشی اهالی آره سیده قطارسواللرنی توغدیریگن. وزیرلردارالانشا سی اوتگن کونی ارسلا جمال نینگ ایش لرنی یخشی منتظم لشتیریش اوچون بو ولایت ده والی صفتیده تعیین لنگنی نی اعلان ایتدی.

بی بی سیگه اوزاسمینی ایتیشی نی ایسته مه گن محلی ارگان لررسمی لریدن بیری بو ولایتده اداری فساد، دولت اداره لری آره سیده هم آهنگ لیک بولمسلیگی واهالی شکایت لری کوپلیگی سبب اقبال عزیزی برطرف ایتیلگنینی معلوم قیلگن.

لوگر ولایتی نینگ سابق حاکمی اقبال عزیزگه قوییلگن عیب لاولرگه اونینگ مناسبتی نیمه لیگی نی اورگه نیش اوچون حرکت قیلدیک، اما بونگه موفق بولمه دیک. عین حالده لوگر ولایتی نینگ ایریم ملت وکیللری بو ولایت حاکمی نینگ برطرف ایتیلیشی باره سیده جمهور رئیس کرزی تمانیدن آلینگن قرارنی خوش قرشیله ماقده لر.

بوحقده حاجی اکبر استانکزی "بیز جمهور رئیس نینگ آلگن قراریدن نهایت خوش میز، درحقیقت یخشی ایش قیله دی، هر بیرحاکم نینگ وظیفه سی بیر ییل دن آشمسلیگی کیره ک، اولرنینگ آلتی وییتی آی اوتیشی بیلن وظیفه لریدن چیتلنتیریلیشلرینی آلقیشله یمیز، ولایت لرده قیین چیلیک لر کوپ دیر، ولایت حاکملری اوزاق مدت، وظیفه لریده قاله بیرسه لرایریم باج آلیش وباشقه مساله لرگه یول تاپیش لری ممکن. جمهور رئیس تمانیدن آلینگن قرارخصوصیده ، باشقه هیچ قنده ی ملاحظم یوق"

لوگر ولایتی نینگ بیر قطار یشاوچیلری، حاکم لراوزگریشیدن راضی ایمس لیک لرینی بیلدیرماقده لر، اما ایش کوزیگه توشه دیگن بیرکیشی بولیشی گه احتیاج بارلیگی نی تاکیدله ماقده لر.

حاکم لرنینگ تیز- تیزاوزگریشی بیر لوگر ولایتیده چیکله نیب قالمه گن، بلکه بیرنیچه ییل جریانیده شمالی بیر قطار ولایت لرده هم قیسقه مدت آره سیده، ایریم ولایت لروالی لری برطرف ایتیلگن ایدی.

بیرقطار اهالی گه کوره، حاکم لرنینگ برطرف ایتیلیش مساله سی یخشی ایش قیله آلمسلیگی واداری فسادگه عیب لنگن لیک لری ایمس، بلکه بیرقنچه سیاسی مساله لرهم بارلیگی نی ایته دیلر.

اما ایریم ولایت لر نینگ حاکم لری هم بار، قریب اون ییل دن بیری، اوز لوازم لریده ایشلب کیلماقده لر. اوشبو شخص لردن بیر قنچه لری سابق جهادی قوماندانلربولیب، ایریم سیاسی حزب لرتمانیدن حمایت ایتیله یاتگن لری معلوم قیلینه دی. بولرنی مرکزی حکومت هم برطرف ایتیش گه قادربوله آلمه گن لیگی تیل گه آلینه دی، شونینگ دیک بیرنیچه ولایت لرده حاکمیت قیله یاتگن والی لردن ایسه اهالی هم راضی لیک کورسه تیب کیلماقده، بونگه ایسه اوزمنطقه لریده قیته قوریش ایشلری رواجلنگنی وتینچلیک نی اورنتیش گه کته رول اوینه گن لری سبب بولگن.