مزارشريفده گي قيزلر ياتاقخانه سينينگ قيينچيليكلري قچان حل بوله دي؟

افغانستان نينگ هر بير ولايتيده دولت و نادولت اوقوو درگاهلري اوچون اطرافدن كيله ياتگن طلبه لرنينگ يششلري اوچون عليحده ياتاقخانه لر موجود.

اولرنينگ بيري هم مزارشريفده گي دولت بيليم يورتيني قيزلر اوچون اجره تگن نسبتن كيچيكراق ياتاقخانه دير. او ييرده تورت يوزدن آرتيق قيز طلبه حيات كيچيريب كيلماقده.

بلخ بيليم يورتيده درس آله ياتگن طلبه قيزلرنينگ تلي گينه قسمي اوشبو بيليم يورتگه عايد قيزلر ياتاقخانه سيده يشب كيليشماقده. ياتاقخانه عمريگه 20 ييلدن آشگن. شونينگ اوچون هم اوييرده قيينچيليكلر تيقيليب ياتگنگگه اوخشر ايدي.

مين ياتاقخانه گه باريب، اوييرده گي اوقووچي قيزلرنينگ موجود معمالريني يقيندن اورگنيشگه حركت قيلديم. قيزلرنينگ هربيريده بير معما بار ايدي.

بيري اگر اويلرنينگ كيچيكليگيدن شكايت قيلسه،‌ باشقه سي اولر اوچون تيارلنه ياتگن اوچ وقتليك آوقت نينگ صحي ايسمليگيني ايتر ايدي. جزيره مه ايسيق كونلرده اويلر هواسينينگ ديمليگي، قيشده اويلرني ايسته ديگن مناسب زمينه يوقليگي كبي نيچه معمالردن ايتيب اوتدي اوييرليك طلبه قيزلر.

ياتاقخانه عمارتيني تشكيل بيرگن او قدر ينگي كورينمه گن كيچيك اويلرنينگ هر بيريده اون و ييگيرمه دن زياده قيزلر اوته قيينچيليكلر بيلن يشب كيله ياتگني بير مسئله،‌ ياتاقخانه اوچون مولجللنگن سوو ذخيره لرينينگ صحي ايمسليگي ايسه باشقه معما حسابلنر ايدي. حمام لرنينگ ايسكيريب كيتگني هم ايريلملر اوچون مذكور مكانده گي جدي مشكللر سيره سيگه كيره دي.

قيزلر ياتاقخانه سيگه ينگي اعضا بولگن فيروزه بانوگه ايسه اوييرده گي قيينچيليكلر آغيرليك قيلردي نظريمده. چپركت و اوي اوچون كيره ك بولگن باشقه اسباب- اسكونه لرنينگ كمليگيني برطرف ايتيش اوچون مسوللر اورينمه ياتگنيني خاطرلب اوتدي او.

طالبه قيزلرنينگ فكرلريچه، ياتاقخانه قيينچليكلريگه ينگي ايجاد ايتيلگن عالي گاه نينگ يولي اوزاقليگي هم كيره دي. اوييرگه موتر بيلن كيته ديگن بوليشسه، چمه سي يريم ساعتليك يول. شونينگ اوچونهم اولر درسگه وقتي بيلن ييتيب باريشلري اوچون مخصوص موترلرنينگ البته كه بوليشيني طلب قيلديلر.

اوزي هم مذكور ياتاقخانه ده يشب كيله ياتگن استادلردن بيري، بلخ بيليم يورتيده گي اوقووچيلرگه درس بيريش بيلن مشغول. او، اوشبو قيينچيليكلرگه برهم بيريش اوچون يقينده، ايشچيلر ياتاقخانه ده قوريليش ايشلريني عملگه آشيريشلريني ايتيب اوتدي. اوييرده گي اينگ كته قيينچيليكلرنينگ بيري ايسه، اويلرنينگ آزليگي. بيش كيشي يششي لازم بولگن خانه ده اون بيش كيشي يشر ايدي. بو مشكل صحي پرابلملرني هم اورته گه چيقريشي ممكن.

افغانستان شمالي حدوديده جايلشگن مزارشريف شهري باشكينت كابلدن كيين تعليم و اورگتيش ساحه سيده ايكينچي مهم منطقه لردن سنله دي. او ييرده درس آله ياتگن طلبه لرنينگ ساني هم كوپ. بو شهرلرگه حتا چيت ايلدن هم طلبه لرنينگ كيليشي كوزه تيليب توره دي. شمالي مزارشريف ده خذمت اوچون قوريلگن دولت بيليم يورتيگه كيله ياتگن كوپلب اوقوچيلرنينگ سانيني اطراف- منطقه لردن كيله ياتگن ياشلر تشكيل بيره دي.