بلخ ولايتي ده روي بيرگن سيلابده 14 كيشي قربان بولگن

بلخ ولايت ولايت كينگشي رييسي محمدافضل حديد نينگ ايتيشيچه، بلخ ولايتي نينگ شولگر، كشندي و كمپ سخي منطقه لريده روي بيرگن سيلاب ده كميده 14 كيشي حياتي ني قولدن بيرگن. اونگه كوره، باشقه 4 كيشي هم درك سيز يوقالگن.

اونينگ معلوم قيليشيچه، اوشبو حادثه عاقبتيده مينگه يقين آدم اوز اوي جايلريني ترك ايتيشگه مجبور بوليب، مزارشريف شهري اطرافيگه كيليب جايلشگنلر.

عين حالده، شو مناسبت بيلن مزارشريف گه سفر قيلگن افغانستان زراعت وزيري محمد آصف رحيمي، خساره كورگن عايله لرگه ايكي يوز تون اوون و يوز تون گوريچ ياردم ييتكزيب بيريشي ني وعده قيلدي. او شونينگ ديك، ويران ايتيلگن زراعت ايكين زارلري نينگ ايگه لريگه هم بوغداي و كيمياوي اوغوت ماده لر ترقه تيله دي ديدي.

اوشبو حادثه قرشي كوره شيش اوچون بوگون ايرته لب بلخ ولايتي ولايت اداره سيده حادثه گه تيگيشلي اداره لر مسووللري اشتراكي ده ييغين هم بوليب اوتدي. اوشبو ييغينده، تمانلر سيلاب نتيجه سيده اوي جايي ني ترك ايتگن عايله لرگه شاشيلينچ ياردم ييتكزيب بيريليشي حقيده چاره تدبير كوريب چيقديلر.

ييغينده شونينگ ديك، حادثه دن كيليب چيققن تلفاتلر ساني انيق لنيشي و اهالي گه خساره لر حسابات گه آلينيشي توغريسيده تيگيشلي اداره لرنينگ اشتراكي بيلن بير قوشمه كميته تشكيل ايتيلدي.

شوحالده، بلخ قيزيل يريم آي اداره سي تمانيدن باش پنه سيز بير مينگ آدم اوچون آذيق آوقت تيارلنيشي باره سيده قرار قبول قيليندي.

شونگه قوشيمچه، فارياب ولايتي اهاليسي نينگ اولوسي جرگه ده گي وكيلي محمد هاشم فاريابي هم اوز تمانيدن سيلابدن ضررلنگن بيش يوز عايله بير وقتليك آوقت تيارلشيني وعده قيلدي.

خبرلرگه كوره، بلخ هوا ميدانيده هم سيلاب يوزبيريب، برچه جايلرني ويران ايتگن. مسووللرنينگ ايتيشيچه، حاضرگه قدر هوا ميدانيده اوچيب قونيش پروازلر هم توخته تيلگن.

افغانستان شمالي ولايتلريده هر ييلي سيلاب روي بيريب، اهالي گه جاني و مالي خساره ييتكزه دي. اوتگن ييلي سرپل ولايتيده روي بيرگن سيلاب ده، اهالي گه كته تلفات ييتگن ايدي