ناتو نينگ بير تيك اوچري افغانستان جنوبيده قولب توشگن

افغانستان جنوبيده بير تيك اوچرنينگ قولب توشگني نتيجه سيده آيساف كوچلري گه خذمت قيله ديگن تورت كيشي هلاك بولگن.

افغانستانده ناتو كوچلري بير سوزچيسي نينگ ايتيشيچه، اوشبو تيك اوچرنينگ قولب توشگني سببي حقيده تحقيقات باشلنگن، اما باشلنغيچ خبرلرگه كوره، مذكور تيك اوچر، قوراللي مخالفلر تمانيدن قوله تيلمه گن.

تيك اوچرده هلاك بولگنلر نينگ حربي ويا ناحربي بولگني بولمه گني هنوزگچه معلوم قيلينمه گن.

ناتو سوزچيسي، اولگن لرنينگ كيمليگي حقيده هم بيرار نرسه ديمه گن. اما زابل ولايتي واليسي معاوني، شنبه كوني بير خارجي حربي تيك اوچر مذكور ولايت ده قولب توشگني ني ايتگن.

محمدجان رسوليار نينگ اسوشيتدپرس گه معلوم قيليشيچه، شاه جوي تومني نينگ تيك اوچر قوله گن محلي، خوفسيزليك كوچلري تمانيدن قورشاو گه آلينگن.

اوتگن آي، جنوبي قندهار ولايتي ده بير تيك اوچر قولب توشگني دن سونگ، شدتلي يامغير نيتچه سيده بيش امريكاليك حربي هلاك بولگن ايدي.