آيسا اداره سي: اوچ آي ايچيده مملكتده 3 يوزمیلیون دالر سرمايه ياتقيزيلگن

افغانستان ده سرمايه ياتقيزووچيلرني حمايه ايتووچي آيسا اداره سي، جاري ييل نينگ بيرينچي اوچ آيي اچيده كميده اوچ يوز ميليون دالر سرمايه ياتقيزيلگن و اوشبو رقم اوتگن ييل نينگ شو آيي گه قره گنده، آشگني ني كورسته دي دیگن.

اوشبو اداره مسووللريدن بيري نينگ ايتيشيچه، سرمايه ياتقيزيش جرياني ني آسانلشتيريش اوچون اوشبو اداره ده بيرمخصوص سيستم ايجاد ايتيلگن واوشبو سيستم اداري فساد نينگ آلديني آليشگه هم ياردم بيره دي.

عين حالده، آيسا اداره سي مسووللري، افغان ياشلريگه ايش زمينه لري مهيا ايتيليشي اوچون بيرقطار اداره و وزيرليكلر بيلن شرطنامه امضالب، اونينگ اساسيده خارجي فقرالرگه خصوصي سكتورلرنينگ مهم اورين لريده ايشلشگه رخصت بيريلمسليگي ني تاكيدله گنلر.

افغانستانده سرمايه ياتقيزووچيلرني حمايه ايتشووچي اداره، سرمايه گزارلرنينگ ايش فعاليتي ني تيز ده آسانلشتيرووچي بير ينگي سيستم ايجاد ايتيلگني خبر بيردي. اوشبو اداره مسووللري بوگون مذكور ينگي ديتا بيز ني آچيش مراسميده، اوشبو سيسم ايشگه سالينيشي بيلن ينگي شركت لر و سرمايه گزار گه ايش رخصنامه سي بيريليشي چاغيده پاره خورليك ني توسيب، يخشي روش ده تيكشيروو آليب باريشي ممكنليگي ني حقيده تاكيدله ديلر. مسووللرگه كوره، حاضر گه مذكور ديتابيز ده كميده 20 مينگ دن آرتيق حجت رويخط گه آلينگن.

آيسا اداره سي باشليغي وفي الله افتخار افغانستانده ييلدن ييلگه سرمايه ياتقيزيش ساحه سي كينگه ييب باريشي ممكن دييدي. او، اوتگن ييل صنعت، زراعت و كانلر ساحه سيده كميده اوچ يوز ميليون دالر سرمايه ياتقيزيلگني ني ايتدي:" كميده اوچ يوز ميليون دالر سرمايه ياتقيريلگن اما كوپچيليگي فعاليتگه باشله مه گنلر. بخت گه موافق 2012 ييلدن بويان اوچ مهم ساحه ده يعني صنعت، زراعت و كانلر ساحه سيده سرمايه ياتقيزيلگن. كيله سي بير ايكي ييل ايچيده سرمايه گزارليك ميزاني آشيشيگه اميدوارميز."

افتخار جنابلري نينگ ايتيشيچه، سرمايه ياتقيزيش ساحه سيده، حاضر گه قدر، افغانستان دولتي ميلياردلب چه افغان درآمد قولگه كيريتگن و شونده ي آسانلشتريش ايشلري عملگه آشيريله ويرگن تقديرده، درآمدلر ميزاني بوندن هم آشيشي ممكن.

آيسا اداره سيگه كوره، اوشبو اداره، افغانستان كدرلريگه ايش شرايطي ني مهيا قيليش اوچون خارجي فقرالرگه افغانستان ده مهم جايلرده ايشلشگه رخصت بيريلمسليگي اوچون تيگيشلي بيرقطار اداره لربيلن شرطنامه امضاله نيشي ممكن:" افغانستان ده مينگلب آدم سيز، اولرعالي معلوماتلرگه ايگه. آيليكلري خارجي خادملرنينگ آيليگي دن آز، خارجي شركتلر خارجي خادملر ني ايشگه قبول قيليشه ديلر، اما بيز اولر گه رخصت بيرمه ي ميز، بيرينچي حق افغانلرنيكي بوله دي. بو ييرده فعاليت قيله ديگن هر بير خارجي شركت بوندن كيين ايچكي ايشچيلرني قبول قيليشي شرط."

سونگي چاغلرده سرمايه ياتيزووچيلر فعاليتي خصوصيده پيدا بولگن اينگ مهم تشويش، خوفسيزليك معماسي دير. ايتيليشيچه، اوشبو مسله بيرقطار سرمايه ياتقيزووچيلرنينگ اوز سرمايه لريني مملكت دن آليب چيقه ياتگني گه سبب بولگن، اما آيسا، اداره سي خوفسيزليك معمالريني سرمايه ياتقيزيش ساحه سيده جدي معما ايكني ني تاكيدله ياتگني گه قره مه ي، افغانستان ده سرمايه گزارليك رواجلنه دي دييدي.