کابل ده مخدر ماده لر بازاری کوپه یگن

Image caption معتاد لر کون کیچره یاتکن منطقه لر کابل ده کوپیب بارماقده

مخدرماده لر گه قرشي كوره ش مخصوص باش قاره لاوچيليك اداره سي، كابلده مخدرماده لر بازاري كوپه يگني ني ايتگن. افغانستان مخدرماده لرگه قرشي كوره ش اداره سي نينگ مخصوص سارنوالليك بوليمي نينگ ايتيشيچه، كابلده پوليس نينگ اعتبار سيزليگي سبب مخدرماده لربازاري كوپه يگن. اوشبو اداره تمانيدن نشر ايتيلگن حساباتگه كوره، كابل نينگ ايريم منطقه لريده مخدرماده لر آچيق و بي ملال روشده ساتيله دي. اما كابل پوليسي مسووللري، پوليس مخدرماده لرني آلدي ني اوچون جدی روشده كوره ش مه ي ياتگني ني ايتگن. عين حالده مزارشريف شهریده هم بيرقطار معتاد لر پوليسني مخدرماده لرني ساته ديگنلر ني آلديني آلمه ياتگنليكده عيبله گن. افغانستان نينگ مخدرماده لرگه قرشي كوره ش بوييچه مخصوص سارنوالليك اداره سي باشليغي احمد خالد موحد، بو باره ده اوز وظيفه سي ني اساسي روشده بجرمه گن مسوول پوليسلرباش قاره لاوچيليككه تنيشتيريليشي باره سيده تاكيدله دي."سيزلر، دكاندارلرنينگ فعاليتي و پوليس حوزه لري نينگ بوحقده سستليگيگه گواه سيز. اولر اوتگن ييلگه قره گنده بو ييل جوده هم اعتبار قره تمه گنلر. بيز بو حالت ني تيكشيره ميز، اوز وظيفه سيده سستليك قيلگن پوليس ني عدلي و قضايي ارگانلر گه تنيشتيره ميز." دیب ایتدی موحد جنابلری

بیراق كابل امنيه قومانداني ايوب سالنگي کابل کوچه لریده بنگی وار ماده لرگه قرشی کوره شدن راضی ایکننی بیلدرگن."كابل امنيه قوماندانليگي نينگ مخدرماده لر گه قرشي كوره ش بوليمي دن راضي ميز، ليكن بير نقط نی ايتيب اوتيشيم كيره ك كه اوشبو اداره هنوز گچه بوخصوصده بير مخصوص سيستم ايجاد ايتيشگه قادر بولمه ي، مخدرماده لرني كشف ايتووچي حوزه لرده گي اداره لرنينگ فعاليتلري مينينگ قبوليمگه سزاوار ايمس. " دیب ایتدی جناب سالنگی.مخدرماده لرگه قرشي كوره ش بوييچه مخصوص باش قاره لاوچيليك اوزي نينگ بير گزارشيده كابل شهري بيرينچي حوزه و باشقه تيگيشلي خوفسيزليك حوزه لرده مخدرماده لرقوله يليك بيلن قولگه كيليشي ممكنليگي ني معلوم قیلگن. اما بيرينچي حوزه آمري، گزارش ده، مذكور حوزه ده مخدرماده لرساتيله ديگن بيرار مركز موجود ايمس ديگن.

مزارشریف پولیس معتادلردن پوله آله دی

مزارشريف ده گي بير قطار معتادلر مخدر ماده لرنی قوله یلیک بیلن تاپیش ممکن. اولرگه كوره، خوفسيزليك كوچلري اولرني شهر و قبرستانلردن هيده ب چيقه ره ديلر، كلتكله يديلر، اما مخدرماده لر ني آليب كيليب ساته دينگلرگه بيرار مناسبت بيلديرمه يدي. "ترياك ساته ديگن شخصلر پوليس بيلن علاقه دار"، دييدي بی بی سی صحبت لشگن معتاد لردن بیری مزارشریف ده. اولرنينگ ايتيشيچه، پوليس ترياك ساته ديگنلرنينگ آلديني آلگن تقديرده، اولر اوشبو عمل ني ترك ايتيشلري ممكن. افغانستانده مخدرماده لر گه معتاد بولگن شخصلر اوچون دوالنيش اساسي مركزلر يوقليگي، اوشبو قتلم اوچون اساسي معما حسابلنه دي. معتادلر ايسه، ييلدن ييلگه كوپه ييب بارماقده. دولت بو حقده جدي اعتبارقره تمه گن حالده، اولرنينگ ساني بوندن هم آشيب، دولت او پيت، بولرني كنترول قيله آلمسليگي ممكن دیب خواطرلر اظهار ایتلماقده.