آواز بيروچيلرني رويخطگه آليش جرياني افغانستان بويلب رسمآ باشلندي

Image caption تورت میلیون شخصگه سیلاو چیپته سی بیرلیشی کوتلماقده.

افغانستان سيلاولر مستقل كميسيوني مسووللري، مملكت بويلب 41 ته كارت ترقه تيش مركزي آچيليب، تورت ميليون آواز بيريش شرايطي ني تولديرگن شخص گه كارت ترقه تيليشي ني اعلان قيلگنلر. عين حالده، شمالي مزارشريفده اهالي دن بيرقطاري بيرگينه كارت ترقه تيش مركز، برچه اهالي اوچون ييترلي بولمه گني ني ايتيب، اونينگ اوزاق ليگي دن شكايت قيلگنلر. اوشبو لايحه بوگون شمالي مزارشريفده هم ايرته لب ايشگه باشله دي. اهالي دن بيرقطاري آواز بيريش كارتلريني قولگه كيريتيش اوچون ايجاد ايتيلگن مركزگه مراجعت قيلماقده لر. اوشبو مركز مسووللريگه بوگون نينگ اوزيده كميده 30 نفر كارت قولگه كيريتيشگه موفق بولگنلر. ليكن اوشبو شهر اهاليسي دن بيرقطاري مزارشريف اهاليسي اوچون ايجاد ايتيلگن بيرگينه مركزني ييترلي ايمسليگي ني ايتيب، سيلاولر مستقل كميسيوني مسووللريدن شهر نينگ باشقه محللريده هم عليحده مركزلر اورنه تيليشي ني طلب قيلماقده لر. اولرشونينگ ديك، مركزنينگ استقامت جايلردن اوزاقليگي دن هم شكايت قيلگنلر. عين حالده، افغانستان سيلاولر مستقل كميسيوني سوزچيسي نورمحمد نور، بوگون كابلده اويويشتريلگن بير خبري انجمنده، اوشبولايحه ايرته لب ساعت 8 ده مملكت بويلب باشلنگني ني معلوم قيلدي:" مملكت بويلب41 كارت ترقه تيش مركزني بوگون ايجاد ايتديك، اوشبو مركزلر 3 ميليون ميليون كيشي ني كارت بيلن تامينله يدي" نور جنابلري گه كوره، كارتلرني ترقه جرياني بيش باسقيچده عملگه آشيريله دي. مهاجرت دن مملگتگه قيتگنلرگه، حمل آيي نينگ سيده 18 ياش گه كيره ديگنلرگه، آلدينگي لايحه لرده كارت آليش گه موفق بوله آلمه گنلرگه، اوز كيملي ني يوقاتگنلرگه و سيلاو حوزه لري اوزگرتيريلگن لرگه كارت بيريليشي ممكن. سيلاولر مستقل كميسيوني سوزچيسي، لايحه شفاف بوليب اوتيشي و قلابليك لر روي بيرمسليگي اوچون، لازم چاره تدبير كوريب چيقيلگنليگي ني تاكيدله دي. اونگه كوره، مملكت بويلب آواز بيريش جمعآ ييتي مينگ مركز ايجاد ايتيليشي ممكن. اوشبو جمله دن 41 ته حاضر گچه آچيليب قوييلگن، كابلده اوچ مركز، ايكي ايكي مركز زونلر مقياسيده و بير بير مركز ايسه ولايتلرده ايش گه باشله گن. اونينگ ايتيشيچه، مذكور 41 مركز 82 محل گه تقسيملشتيريلگن بوليب، اولردن 41 ته سي ايرككلرگه و باشقه 41 ته سي عياللرگه اجره تيلگن. اونگه كوره، اوشبو لايحه بيرينچي ده 34 ولايت نينگ مركزلريده، و كيينچه ليك تومنلرده هم كوچيريليشي كوتيليب، جاري ييل اسد آيي نينگ بيشينچي سيدن ميزان آيي نينگ بيشينچي سيگچه مملكت بويلب دوام ايتديريليشي ممكن. اونينگ معلوم قيليشيچه، لايحه عمومآ آلگنده، جمهور رييسليك و ولايت كينگش سيلاولريدن ايكي هفته آلدينگچه دوام ايتديريله دي. سيلاولر مستقل كميسيوني سوزچيسي نينگ ايتيشيچه، سيلاولر بوليب اوتيشيده جمعآ 120 ميليون دالر خرجت صرفلنه دي و اوشبو مبلغ افغانستان گه علاقه لي امريكا، اروپا و توركيه مملكتلري تمانيدن توله نيله دي.