یونیسف اداره سی: ناقرارلیک لرده باله لر تلفاتی کوپیگن

بیرلشگن ملتلر تشکیلاتی نینگ باله لر بویچه اداره سی، یونیسف گه کوره، جاری ییل نینگ تورت آیی اولینی اوتگن ییل نینگ عینی زمانی بیلن سالیشتیرگنده افغانستان بویلب یوزبیرگن ناقرارلیک لرده باله لر هلاکتی 27 فایز کوپیگن.

یونیسف اداره سی تمانیدن ترقه تیلگن حساباتده یازیلیشیچه، جاری میلادی ییل نینگ تورت آی اولیده یوزبیرگن ناقرارلیک لرده، 414 باله هلاک بولگن. میلادی 2012- ییل نینگ تورت آیی آولیده یونیسف حساباتیگه کوره، 327 باله قربان بولگن ایکن.

انتحاری هجوملر، یول چیککه سیده اوره تیلگن ماین پارتلش وهوای هجوملر عاقبتیده باله لر قربان بولیب کیله یاتگنی ایتلگن.

یونیسف اداره سی نینگ کابلده گی سوزچیسی عزیز فروتن بی بی سی بیلن بولگن صحبتیده، برچه اوروش تمانلری بوخصوصده عیبدار ایکنینی تاکیدله دی:" بیز باله لر باره سیده گی رقملرنی هربیر تورت آیده تیکشیره میز، جاری میلادی نینگ تورت آی اولینی اوتگن ییل نینگ عینی زمانی بیلن سالشتیردیک، بوایسه باله لر هلاکتی نینگ 27 فایز کوپیگنینی کورسه ته دی. برچه تمانلر عیبدار، اما بیزنینگ حسابات میزده، اکثر باله لر انتحاری هجوملر و یول چیککه سیده اورنه تیلگن ماین پارتلش لر عاقبتیده قربان بولگن، بیراق خلق ارا کوچلر تمانیدن یولگه قوییلگن هوای هجوملرده هم باله لر قربان بولگن."

یونیسف اداره سی نینگ ایتیشیچه باله لرنینگ اکثریتی انتحاری هجوملرده قربان بولگن، شو اوچون کوپراق طالبان عصیانچیلری مسوول دیه کورسه تیلگن.

یونیسف اداره سیگه کوره، قریب بیرهفته آلدین پکتیا ولایتده گی مکتب لردن بیری مقابلیده یوزبیرگن انتحاری هجومده 10 باله اولیب وبیرقنچه باله یره لندی، اما طالبان سوزچی لریدن ذبیح الله مجاهد بی بی سی بیلن بولگن تیلفونی صحبتیده یونیسف تمانیدن چیقاریلگن حساباتنی ردایتیب حقیقی بیر حسابات بولمه گنینی ادعا قیلدی.

عینی حالده، بیرلشگن ملتلر تشکیلاتی نینگ باله لر بویچه اداره سی اوز حساباتیده بو وضعیت دن جدی خواطر بیلدیریب، باله لر عیاللر وتینچ فقرا تلفاتینی آلدینی آلیش اوچون اوروش تمانلری نینگ جدی اعتبار قره تیشگه اونده گن.

شونینگ دیک اوروش تاکتکیلریگه اوزگریش آلیب کیلیش هم طلب قیلینگن.