جوزجان حاكمي گه قرشي نمايش يولگه قويلدي

شبرغان ده يوزلب كيشي جوزجان حاكمي محمد عالم ساعي گه قرشي نمايش اويوشتيريب، اوني چيتله نيشي ني سوره گنلر. اوشبو نمايش اوتگن كون جوزجان حاكمي محمد عالم ساعي و ملي جنبش رهبري جنرال دوستم قوريقچيلري ارا يوزبيرگن آتيشمه دن سونگ جنرال دوستم طرفدارلري تمانيدن يولگه قويلدي.

اوتگن كون جوزجان حاكمي جنرال دوستم ني اونگه قرشي هجوم قيلگنليكده عيبله دي.

نمايش ملي جنبش مهمانخانه سي آلديده باشلنيب، نمايشچيلر جوزجان حاكمي گه قرشي" اوليم و معامله گر"ديب شعار بيرديلر.

نمايشچيلر حاكم ني جنرال دوستم گه قرشي قورال ايشلتگنليكده عيبلب، طلب لري انابتگه آلينمه گن تقديرده، كينگ قمراولي نمايش لرني يولگه قوييشلري ممكنليگي باره سيده آگاه لنتيرديلر.

ملي جنبش ولايت كينگشي رييسي كينجه كارگر، نمايش جريانيده ملي جنبش حزبي برچه سستليك و اهالي قيينيچيكلريگه چيده ب توره آله دي، ليكن جنرال دوستم گه قرشي هجوم گه چيده آلمه يدي ديدي.

او، دولت محمد عالم ساعي ني لوازميدن چيتله تيب،جنرال دوستم قضيه سي تيكشيريليشي اوچون هييت يوباريشي كيره كليگي ني تاكيدله دي.

بوندن ايكي كون آلدين، جوزجان واليسي، جنرال دوستم اوز قوريقچيلري بيلن اونينگ شبرغانده گي اوييگه هجوم قيلگنيني ايتگن ايدي اما اونینگ ایتیشیچه، او اوز قوريقچيلري بيلن اوزلريني سقلب قاليش اوچون، دوستم و اونينگ قوراللي لريني محل ني ترك ايتيشده مجبورله گن.

جوزجان حاكمي، جنرال دوستم اوتگن كيچه اوني ملي جنبش ني حمايه لشي و اوز علاقه سيني دولت دن اوزيشي ني طلب قيلگن، عكس حالده، اوليم گه تهديد قيلگني ني ادعاقيلدي. اونگه كوره، او اوشبو ايستك ني رد ايتگن پيتده اونگه قرشي هجوم قيلگن.

اما جنبش اعضالري، جنرال دوستم، جوزجان حاكمي بيلن ملاقات اوتكزيش مقصديده بارگن بيرچاغده، حاكم توشونماوچيليك سبب اونگه هجوم قيلگني ني ايتماقده لر.

نمايشچيلردن بيرقطاري كيليب چيققن وضعت دن تشويش بيلديريب، حاكم دن استعفاگه چيقيشي ني سوره ماقده لر.

جنرال دوستم و محمد عالم ساعي ارا پيدا بولگن جنجل، اهالي ني خواطرگه ساليب، خوفسيزليك وضعيت ني يامانلشتيرگن.

اعتراضچيلر بير اوچ ماده لي قطعنامه صادر ايتيب، جوزجان واليسي ني جنرال دوستم گه قرشي يينگيل و آغير قورال ايشلتگنليكده عيبلب، حكومتدن اوني محكمه گه بيريشي ني سوره ديلر.

اما جوزجان حاكمي محمد عالم ساعي، بو ني زوردن يولگه قوييلگن نمايش ديب اته دي. اونگه كوره، جنرال دوستم آدملري بيرقطار ياشلرني اونگه قرشي نمايش گه ترغيبله گنلر.

جنرال دوستم و جوزجان واليسي ارا يوز بيرگن آتيشمه دن سونگ، خوفسيزليك كوچلري جمله دن ملي اردو عسكرلري شهر نينگ چهار رهه لري و و حاكم نينگ اوييگه يقين منطقه لرده كيزمه اوتكزماقده لر.

بوگون توشدن كيين بيليم يورت و مكتبلر ايرته راق تعطيل قيلينيب، شهر دكانلري ياپيلگن.

عين حالده، اوتگن كون ملي جبهه، جوزجان حاكمي ني جنرال دوستم گه قرشي هجوم قيلگنليكده عيبلب،اوشبو عمل قانون و سياسي اخلاق دن اوزاق ايكنليگي ني ايتيب، قاره له دي.

جنرال دوسم حكومت گه مخالف ملي جبهه نينگ اينگ يوقاري اعضاسي هم سنه له دي.

جوزجان حاكمي شونينگ ديك، جنرال دوستم اوني بوندن اوچ آلدين جوزجان حاكمي صفتيده ييتيب تعيينلگني ده هم تهديد قيلگني ني ادعا قيلدي.