امريكا تشقي ايشلروزيري طالبان بيلن مذاكره لر عملگه آشيريليشيگه شبهه بيلن قره ماقده

امريكا تشقي ايشلروزيري جان كيري طالبان بيلن مذاكره لر باشله نيشي باره سيده شبهه لي فكر بيلديرگن. قطر پايتختي دوحه ده طالبان اوچون آچيلگن اداره نينگ فعاليت قنده ي ليگي اوستيده پيدا بولگن جنجللر، صلح كيليشوو مذاكره لري ني مركب لشتيرگن.

كيري جنابلري، اوتگن كونگي حادثه لرگه قره گنده، كيليشوو مذاكره لر جرياني توغري يولگه باشقريليشيگه ايشانمه ي من ديدي.

شونگه قره مسدن امريكا نينگ افغانستان اوچون يوبارگن مخصوص نماينده سي جيمز دابينز، دوحه كون كيچيرماقده. بوندن آلدين اونينگ طالبان بيلن كيله سي بير نيچه كونلر ايچيده مذاكره قيليشي كوتيلردي.

امريكا بير رسمي سي نينگ فرانسه خبر آژانسيگه، دابينز جنابلري جان كيري بيلن قطر يوقاري لوازملي رسميلري بيلن اوچره شيشي ني ايتگن.

كيري جنابلري نينگ ژورناليستلرگه:" بيز طالبان بيلن آليب باريله ديگن مذاكره لر توغري يولگه باشقريشي ني بيليشيم كيره ك" ديگن.

اما او شونده ي ايش نينگ بوليب بولمسليگي ني بيلمه يميز ديگن.

كيريگه كوره، اولر طالبان نينگ جوابيني كوتماقده لر.

جان كيري نينگ معلوم قيليشيچه، طالبان كيله هفته لرده مذاكره قيليش گه قرار قبول قيلمه گن تقديرده، اولرنينگ قطرده گي نماينده ليگي ياپيليشي ممكن.

"اسلامي امارت"

طالبان اوتگن هفته نينگ شنبه كوني "افغانستان اسلامي امارت سياسي اداره سي" ني دوحه ده رسمي روشده آچيب، بيراغي ني اوييرده كوتردي.

امريكا دولتي اوزي نينگ ايلك عكس العمليده طالبان بيلن مذاكره قيليشگه تيارگرليك كورستدي، اما افغانستان حكومتي، اداره نينگ آچيليشي، امريكا بوندن مقدم افغانستان گه بيرگن وعده لريگه ضد ايكني ني ايتيب، قطرده گي مذاكره لرده قتنشمسليگي ني اعلان قيلدي.

افغانستان دولت رسميلري، اداره نينگ آچيليشي خلق ارا قانونلر گه ضد بوليب، اوشبو مملكت بير پيتده بير خارجي مملكتده ايكي نماينده ليككه ايگه بوله آلمسليگي ني تاكيدله ماقده لر.

قطرده گي اداره دن طالبان بيراغي و لوحه سي آليب تشلنگنليگي گه قره مه ي، تينچليك عالي كينگشي اوني ييترلي بيلمه ي، او ييردن اوروش حقيده يوباريلگن پيغاملر، افغانستان حكومتي گه قبول قيليشگه سزاوار ايمسليگي ني ايتگن.