Мултимедиа ўйнаш бу қурилмада дастакланмайди

ساعي: مين شبرغان ني اهاليگه تلفات و خساره ييتمسليگي اوچون، ترك ايتديم

محمد عالم ساعي نينگ بي بي سي بيلن اوتكزگن صحبتيده، او اوز اورين باسريني اوز اورنيده سرپرست قيليب، جوزجان ني ترك ايتگني ني معلوم قيلدي.

اوشونينگ ديك، جوزجان ني ترك ايتگني گه، نمايشلر جريانيده وضعيت يامانلنيشي و اهالي گه ضرر نقصان ييتمسليگيني سبب قيليب كورستدي.

اونگه كوره، او كابلگه باريب، جمهور رييس كرزي بيلن صحبتلشيب، اونينگ قراري اساسيده عمل قيليشي ممكن.

او، جوزجان ده اونگه قرشي اويوشتيريلگن نمايشلرني، بيرقطار شخصلرنينگ اهالي ني اولديريش وتينچليك ني برهم اوريش مقصديده، يولگه قويلگني ني ادعا قيلدي.

بوندن آلدين او، اعتراضلر جريانيده نمايشچيلرگه اوز اعتراضلريني توختتگن حالده، ولايت ني ترك ايتيشي ممكنليگي باره سيده گي خبر ني رد ايتيب، بوحقده هيچ كيم بيلن بونده ي قرار قبول قيلينمه گني ني تاكيدله دي.

عين دمده، مركزي دولت بير اعلاميه آرقه لي جوزجان ده جنرال دوستم طرفدارلري تمانيدن ولايت حاكمي محمد عالم ساعي گه قرشي ايوشتيريلگن اعتراض نمايشلرهمده اونينگ سببلريني كوريب چيقيش اوچون ولايت گه هييت يوباريشگه قرار قبول قيلگن ايدي، اما هنوز مذكور هييت ولايت گه ييتيب كيلمه گن.

شونگه قره مسدن، بوگون مزارشريف ده يوزگه يقين جنرال دوستم طرفدارلري جوزجان حاكمي گه قرشي ناراضليك نمايش اويوشتيرديلر. نمايشچيلر، دوستم محله سيده ييغيليب، جوزجان حاكمي محمد عالم ساعي گه قرشي شعار بيرديلر.

جوزجان حاكمي محمد عالم ساعي ملي جنبش رهبري جنرال عبدالرشيد دوستم ني اونينگ اوييگه باستيريب كيرگنليكده عيبلب له دي، اما جنرال دوستم طرفدارلري دوستم جنابلري اوبيلن ايريم مهم مسله لراوستيده صحبت قيليش اوچون بارگني ني معلوم قيلديلر. اوشبو جنجل لر آرتيدن جنرال دوستم طرفدارلري حاكم گه قرشي نمايش اويوشتريب، اونينگ لوازميدن چيتله نيشي سوره ديلر.