عصيانچيلر حربي كييم ني قه ييردن قولگه كيريته ديلر؟

Image caption انتحاری هجوملرده حربي كييم دن فايده لنيش ميزاني آشگن.

افغانستان خوفسيزليك و چيت ايل كوچلري بيلن توغري دن توغري كته _ كيچيك شهرلر حتي پايتخت كابلده جنگ قيله ديگن طالبان و باشقه قوراللي مخالف گروه لر، كاركوشته بولگنلر.

افغانستان دولت قوراللي مخالفلري تمانيدن جنگ شيوه لري وتكتيكلريني اوگرتيرگني، اوشبو مملكتده دوام ايته ياتگن اوروش ني ينه ده قيينلشترگن.

عصيانچيلراوز هجوملريده افغان حربي كييمي همده ناتو كوچلري نشان لريني ايشله تيش، اولرنينگ جنگ تكتيكلري وشيوه لريدن اورنك حسابلنيب، افغانستان عسكرلري اوچون دوست و دشمن ني تنيش قيين بولگن.

يقين ده حربي كييم دن فايده لنگن عصيانچيلردن بيري ملي خوفسيزليك باش اداره سي نينگ ايشيگيگه اوزيني ييتكزگن چاغده، ملي خوفسيزليك خادملري تمانيدن آتيب اولديريلدي.

عصيانچيلر اوزي نينگ خودكش هجوملريده عياللر كييمي و برقع دن هم فايده لنگنلر.

عصيانچيلر حربي كييم ني قه ييردن قولگه كيريته ديلر؟

افغانستان خوفسيزليك كشف اداره لري هنوزگچه عصيانچيلر حربي كييملر و جهازلرني قه ييردن قولگه كيريته ياتگني باره سيده بيرار نشان تاپيشگه موفق بولمه گنلر.

ايچكي ايشلروزيرليگي بونگه مملكت چيگره سي كينگ بولگني ني سبب قيليب كورستيب، قوراللي مخالفلرني حربي كييملردن فايده لنيشي آلينيشي ني قيين ديه تاكيدله يدي.

اوشبو وزيرليك مسووللري، خودكش هجوملرده حربي كييم دن فايده لنيش ميزاني آشگني دن سونگ، اوزي نينگ استخبارات و كشفي فعاليتلريني كينگه يتيرگنيني ايتگنلر، اما هنوز گچه قوراللي مخالفلرنينگ حربي كييم دن فايدن لنيش حاللري آلدي آلينمه گن.

ايچكي ايشلروزيرليگي سوزچيسي صديق صديقي نينگ بي بي سي گه ايتيشيچه:" بيز پوليس كييمي توغريسيده چاره تدبير كوريب چيققن ميز، كييملر ساتيليشي و اوني آلديني آليش گه سعي وحركت قيلديك، اما مملكت حدودي كينگ بولگني باعث، اوني كيسكين شكلده آلديني آلالمه گن ميز".

صديقي جنابلري گه كوره، بيرقطار شخصلر ياشيرين روشده پول قولگه كيريتيش مقصديده، پوليس كييم كيچكلريني ساتيش اورينماقده.

كابل نينگ قاره بازاري

Image caption قاره بازار نينگ كوچه سيده دولت كييم و نشان لريني ساته ديگن كميده 50 ته دكان موجود.

كابل نينگ قديمي بازارلري، پايتخت نينگ اينگ اورته سيده جايلشگن. پل خشتي كابل نينگ اينگ گاوجوم و تيقينچ منطقه سيده دير. او ييرده تاووغ تخمي و آدمزاد سوتي هم تاپيليشي ممكن.

كابل نينگ كهنه فروشليك بازاري، عجيب بير محل، بيز اوشبو محلگه كيرگنيميزده ساتووچيلر اوزلري نينگ كونده ليك ايشلري بيلن بند ايديلر، بازار نينگ كيريش ايشيگيده تورلي خيل ايچكي و خارجي حربي كييملر ونشان لر آسيلگن ايدي.

اما دكاندارلر بيز نينگ دوربينيميز ني كورگن پيت، شاشليب كييملرني ييغيشتيريشگه اوريندي. بير آزدن سونگ، كابل نينگ قاره بازاري قيافه سي باشقه چه يعني عادي حالتگه اوزگردي.

اوشبو بازاردن حربي كييم ساتيب آلگن عبدالرحمن نينگ بي بي سي گه ايتيشيچه:" حربي كييم ساتيله ديگن دكانلر گه بارديم، كيين ساتووچي توليق حربي كييم ني مينگه بيردي".

افغانستان اوشبو پوليس عسكري، دكاندار ساتيش چاغيده پولدن باشقه اوندن هيچ قنده ي حجت سوره مه گني ني ايتدي.

عبدالرحمن شونينگ ديك، ساتووچي اوندن كميده 500 افغاني سوره گن خلاص.

قاره بازار نينگ كوچه سيده دولت كييم و نشان لريني ساته ديگن كميده 50 ته دكان موجود.

ايسكي متاعلرني ساتيله ديگن كوچه نينگ حربي كييم تيكاووچيلر اويوشمه سي رييسي محمد حكم، او هر كوني بير ايكي بار دكانلرني نظارت ايتيشي ني ايته دي.

حكيمي نابلري، كهنه فروشي كوچه سيده حربي كييملرني ساتيش جريانيتوخته تيليشي اوچون سعي وحركت آليب باره ياتگني ني معلوم قيلدي.

اما افغان وخارجي كييمي يانيده، كابل قاره بازاريده، دولت نشاني هم ناچيز پول گه ساتيلماقده.

حربي نشان جنرال نشانلري، حربي درجه لر كميده 38 دن 45 افغانيگه ساتيله دي.

Image caption ایچکی ایشلروزیرلیگی: بيرقطار شخصلر ياشيرين روشده پول قولگه كيريتيش مقصديده، پوليس كييم كيچكلريني ساتيش گه اورينماقده.

"دشمن اورتاق كييميده"

افتيدن قوراللي مخالفلر اوشبو هجوم ني تشكيللشتيريلشتيريشگه موفق بولگني دن سونگ، افغان خوفسيزليك كوچلري كييمي دن فايده لنگنلر. شهر تيكشيروو بيكتلري عمومآ آلگنده حربي كييم كيينگنلرني تيكشيرمه يديلر. شو مسله طالبان گه افغانستان كوچلريني ضعيفلشتيريش اوچون هجوم اويوشتيريش فرصتي ني مهيا قيلگن.

شهر ده گي بيكتلر و خوفسيزليك مركزلر، عمومآ، حربي كييمده گي آدملرني تيكشيرمه يدي

بوندن بير آي آلدين خودكش هجومچيلر تينچ مركزده جايلشگن پنچشير ولايت بناسي گه هجوم قيليب، ولايت بناسي ني اوتگه يانديردي. اولر ملي پوليس كييمي و نشانلري بيلن جهاز لنگن ايديلر.

هجوم دن كيليب چيققن توقنه شوو دن سونگ، مين اوشبو ولايت گه سفر قيلديم و هجومچيلربيلن توقنسگن پوليسلردن بيري بيلن صحبت لشديم.

اونگه كوره:"مين ايرته لب ولايت بناسي قرشي سيده كيزمه قيلماقده ايديم، بير آق سراچه بيرنيچه پوليس ني توشيردي، مين اولرني اوز همكارلريم اويله ديم. موتر هيداوچيسي حربي كييم ده ايمس ايدي، عصيانچيلر بولگني ني بيلگنده ايديم، اولرگه قره ته اوق اوزلرديم".

افغانستان حكومتي اهالي و خوفسيزليك كوچلري ارا ايشانچ تامينلنيشي اوچون كته مبلغ صرفله گن.

حاضرافغانستان حكومتي عصيانچيلرنينگ خوفسيزليك كوچلري نينگ كييمي دن فايده لنه ياتگني آلدي آلينيشي گه موفق بوله آلمه گني، اهالي و حربي كوچلر ارا ايشانچگه صدمه ييتكزيب، عصيانچيلر ني پوليس بيلن تفكيكلش، معما بوليب قاليشي ممكن.