افغانستان اردو قوماندانی: پاکستان افغانستانده گی اوروشگه پایان بیریشگه قادر

Image caption شيرمحمد كريمي، پاكستان ايسته گن حالده، عصيانچيلر تمانيدن افغانستان دولتي قرشي آليب باريله ياتگن جنگ، بير هفته ايچيده اوز نهايه سيگه ييتيشي ممكن دييدي.

افغانستان ملي اردوسی نینگ يوقاري لوازملي قومانداني شيرمحمد كريمي، پاكستان افغانستانده گي اوروشگه پايان بيريشگه قادر ايكنليگي ني ايتدي. جناب کریمی نينگ بي بي سي گه ايتيشيچه، پاكستان طالبان ني هم كنترول قيله دي و هم اوني قوللب قووتله يدي. شيرمحمد كريمي، پاكستان ايسته گن حالده، عصيانچيلر تمانيدن افغانستان دولتي قرشي آليب باريله ياتگن جنگ، بير هفته ايچيده اوز نهايه سيگه ييتيشي ممكن دييدي.

افغانستان ملي اردو لوي درستيزي شيرمحمد كريمي، پاكستان ني طالبان گروهي ني رهبرليك و اولرني قوللب قووتله ياتگنليكده عيبلب، شونينگ ديك اولرگه باش پنه بيريب، قوراللنتيريب افغانستانگه جونه ته ياتگني ني ايتدي.

افغانستان اردوسي اوشبو يوقاري لوزاملي رسمي سي، پاكستان برچه ديني مدرسه لرني ياپيب، او ييرده گي طالبلرني افغانستانگه تمان باشقرگن ديدي.

كريمي جنابلري، امريكا و پاكستان، افغانستانده تينچليك وبرقرارليك تامينلنيشي گه راضيليك بيلديرگن تقديرده، افغانلر تينچليككه ايريشيشي ممكنليگي باره سيده تاكيدله دي.

او، پاكستان ني افغانستان ده گي تينچسيزليك لرده مهم رول اوينه ياتگنليكده عيبلب، پاكستان طالبان رهبرلري ني باسيم آستيگه آليب، صلح گه راضي قيلگن تقديرده، اينگ كته خذمت قيلگن بوله دي ديدي.

اونگه كوره، پاكستان طالبان رهبرلريني افغانستان دولتيگه قرشي جنگلريني توخته تيشگه اونده شي كيره ك، افغانستان رسميلري، هر دايم طالبان پاكستان چيگره لري حدوديده كون گيچيره ياتگني ني تاكيدلب كيلگنلر. افغانستان دولت رسميلري شونينگ ديك، بار بار پاكستان استخبارات تشكيلاتي ني طالبان گروهي ني حمايه قيله ياتگنليكده عيبلب، اولرنينگ بونده ي حمايه سيزليگيده، افغانستان ايچكريسيده قوراللي عملياتلرگه دوام ايتديريشگه قادر بوله آلمسليگي تاكيدله ماقده لر. منطقه كوزه تووچيلري، 1994، طالبان گروهي _ يا طالبلر _ اسلامچي ايسكتيريمست گروهي دن تشكيل ايتيليب، شوروي لر تمانيدن افغانستان اشغال ايتيلگن دور جريانيده، شوروي قشوني گه قرشي مجاهدين صفتيده جنگ قيلردي دييديلر.

عصیانکارلردن حمایت افغانستان رسميلري، شوروي لر قشوني افغانستان ني ترك ايتگن سونگ، طالبان گروهي نينگ تشكيليده پاكستان نينگ اسخبارات اداره سي رولي كته بولگني ني تاكيدله ماقده لر. طالبان گروهي ميلادي 1996 ييلده كابل ني تصرف ايتيش بيلن، افغانستان حاكميتي ني قولگه آليشگه موفق بولدي. شوبيلن بيرگه پاكستان مذكور گروهي بير حكومت صفتيده رسميت گه تنيب، سياسي علاقه لريني تامينله دي. ليكن اوشبو گروه، ميلادي 2001 ييلده امريكا رهبرليگي ده خلق ارا ايتلاف كوچلري نينگ هجومي نتيجه سيده قوله دي و افغانستان رسميلري گه كوره، طالبان رهبرلري و قالگن اعضالري پاكستان گه اينيقسه، او مملكت نينگ افغانستان بيلن چيگره داش بولگن شمال غربي حدوديديگه كيريب جايشگنلر. بير نيچه ييلدن سونگ، طالبان افغانستان حكومتيگه قرشي قوراللي هجوم لريني باشله دي و اوشبو گروه و ناتو رهبرليگي ده گي خلق ارا ايتلاف همده افغان كوچلري بيلن باشله دي و بو هجوملر شونينگ ديك، دوام ايتديريليب، حربي و ناحر آغير تلفات يوز بيريشيگه سبب بولدي. بيرقطار افغان و امريكا رسميلري پاكستان خوفسيزليك اداره لريني آچيق آيدين طالبان ني افغانستان دولتي گه قرشي عملياتلرده حمايه قيله ياتگنليكده عيبله گنلر، اما پاكستان دولتي اوشبو ادعا لرني هردايم رد ايتيب كيلگن.

پاكستان ني طالبان ني قوللب قووتله ياتگنليكده عيبله گنلرگه كوره، پاكستان، افغانستان مركزي دولتي ني ضعيفلشتيريش و افغانستان ده پاكستان ني اطاعت قيله ديگن حكومت ني اورنه تيش نيتيده. بونينگ برابريده، پاكستان دولتي، افغانستان دولتي گه مخالف هيچ بير گروه ني حمايه قيلمه ي، اوزي تيرورچيليك و ايكستيريمست هجوملرنينگ قرباني بوله ياتگني ني تاكيدله ماقده. پاکستان تشقی ایشلر وزیرلیگی ایسه جنرال شیر محمد کریمی نینگ سونگی اظهارلرینی دشمنانه دیب بیانات چیقرگن. پاکستان تشقی ایشلر وزیرلیگی افغان رسمی لر تمانیدن قیلنگن عیبلاو لرنی رد ایتیب، ادعا لرینی اساس سیز دیب بهاله گن. جنرال كريمي، سونگي طالبان افغانستانده قوراللي اوروش گه پايان بيريش مقصديده امريكا و افغانستان دولتلري بيلن مذاكره قيليش اوچون قطر پايتختي دوحه ده نماينده ليك آچگن بيرپيتده، اظهارات بيلديرماقده.