مصرده گي توقنه شوولرده قربانلر ساني اوتيز دن آشگن

Image caption مرسي طرفدارلريگه" تينچ نمايشلر"اوچون رخصت بيرگن اردو اولرگه قرشي اوت آچگني ايتيلدي.

مصرده گي وضعيت بارگن سري مركبلشيب بارماقده. مملكت نينگ برچه شهر كوچه لريده توقنه شوولر اوج آلگن.

ترتيب سيزليكلر نمايشچيلر محمد مرسي قمب قوييلگن ديب ايشانيله ديگن حربي بيزه گه قره ب اوره باشله گنلريدن سونگ، باشلندي. اولر مرسي ني قووتلاوچي شعارلرني ايتيب قيچقيريشردي.

دركچيلرنينگ سوزلريگه كوره، بير قنچه نمايشچيلر مرسي نينگ صورتي ني حربي قونلغه اطرافيده گي تيكنلي سيم توسيقلر اوستيگه اورنتماقچي بوليشگنده، اوق آوازلري ينگره دي.

اوق نمايشچيلرگه قره ته هم اوزيلدي. حربي هوا ميداني آلديده ييغيلگن نمايشچيلر حربي لرنينگ بو حركتي دن اوز غضبلريني بيلديريشه دي.

" بيز قوراللي كوچلررهبري جنرال ال _ سيسيگه ايته ميز، اگر بيزنينگ جمهور رييسيميز ني قيترمه سه، بيز اوني چيقه ريش اوچون كوچ ايشله تيشگه تيارميز."_ دييدي آدملردن بيري.

آخرگي خبرلرگه كوره، مصر نينگ ايكينچي ييريك شهري الكسندرایه ده 12 كيشي، قاهرده اوچ كيشي هلاك بولگن. جمعه كوني مصر بويلب 30 دن آرتيق كيشي قربان بولگن، اولرنينگ اكثريتي اوق تيگيب اولگني ايتيله دي.

مرسي طرفدارلريگه قرشي جنگده مخالفت تمانيگه خوفسيزليك كوچلري هم قوشيلگن.

مخبرلرنينگ ايتيشيچه، شهرده بير نيچه ساعتلر دن بويان آتشمه آوازلري دوام ايتماقده. تمانلر بير _ بيرلريگه تاش آتگنلر.

مخالفت طرفدارلريدن بيري قوليده ملي بيراق بيلن بلند بنا تامگه چيقيب آلگن ئ مرسي شآنيگه حقارتلي سوزلرني ايتيب قيچقيرگن.

بونگه جوابآ اسلامي لر هم تامگه چيقيشگن و زوره وانليكلر او ييرده دوام ايتگن.

تحرير ميداني ده گي سيد احمد اسملي نمايچيگه كوره، "مسلمان برادرلر" طرفدارلري ايندي اوچ آليشني خواهلشماقده:

"بيزنينگ طلبلريميز بجريلدي، ليكن برادرلرنينگ طلبلري عملگه آشمه دي. اولر قان توكيش ني ايتشماقده. بيزنينگ طلبلريميز نان، آزادليك و اجتماعي عدالت دير. بيز بوتون مصرده بو نرسه گه ايريشيش ني خواهله ي ميز. بز هر بير مصرليك او حقوقيگه ايگه بوليشي ني ايسته يميز"_ ديدي او.

مسلمان برادرلر طرفدارلري قاهرده كي ربعه مسجدي آلديده تورشيبدي. بير نمايشچي نينگ ايتيشيچه، جمعه كونگي قان توكيليشي عكسي حكومت ني قيترماقچي بولگنلر تمانيدن اويوشتيريلگن:

"كيچه بوتون مصر بويلب صادر ايتيلگن زوره وانليكلر جنرال، عبدالله فتاح ال سي سي باشليق قوراللي كوچلرنينگ حربي تونه تيريش آرقه لي ايسكي حكومتني قيته ريب آليشگه اورينيشديلر. ليكن اولر بونگه ايريشالمه يديلر، چونكه 32 ميليون دن آرتيق كيشي كوچه لرگه چيقيب، حربي تونته ريش ني قاره لشدي".

مرسي طرفداري بولگن احمد ال طلبي ديگن كيشي" بيز نمايشلرني دوام ايتيره ميز. خداگه خواهلسه، تحرير ميدانيگه قيته ميز و جمهوررييس محمد مرسي آزاد بوليب، جمهور رييسليككه قيته دي"، ديب ايشانيشيني ايته دي.

Image caption پوليس حركت ني جلولش مقصديده نيل آرقه لي اوته ديگن كوپريك ني ياپيب، حربي ميدان اطرافيگه سيملي توسيقلر اورنتگن.

ينه بير نمايشچي ايسه يره شوو طرفداري، اوزروانليك و قان توكيشلر توگه تيليشيني ايسته ي ميز. بو اساسي چاره ايمس.

"يوق، بيز قان توكيليشيني ايسته مه يميز. بو اساسي چاره ايمس. زوره وانليكلردن نفرتلنه ميز. بيز تينچليكده يشش ني خواهله يميز. اولرنينگ هم طلبلري بيزنيكي كبي بجريليشي كيره ك. بيزنينگ همه ميز دموكراسي دن اولوشيميز ني آليشيميز. هيچ كيم ني چيكله شيميز كيره ك ايمس. بيز همه ميز مصرليك لرميز"، _ دييدي او.

شو طريقه قدرت دن كيتكه زيلگن جمهور رييس مرسي طرفدارلري و حربي كوچلر اورته سيده گي قانلي توقنه شوولرده اولگنلر ساني 60 گه ايتدي. 600 دن آرتيق كيشي يره لندي.

بير ييل مصرده گي انقلاب نتيجه سيده قورتگه كيلگن جمهور رييس عاموي نمايشلر آرتيدن اغده ريلدي و حبسگه آليندي.

اونينگ مخالفلري تحرير ميدانيده بيره م قيليشركن، مرسي طرفدارلري ينگي حكومتگه قرشي نمايشگه چيقيشدي.

جمعه نمازيدن سونگ، كوچه جنگلري قاهره، الكسندريه و باشقه ييريك شهرلرني قمره ب آلدي.

مخبرلرگه كوره، "مسلمان برادرلر" حركتي نينگ رهبري محمد بديعي نينگ مسجد آلديده گي چيقيشي نمايشچيلرني روخلنتيرگن و ينگي حكومتگه قرشي كوچه گه چيقيشگه تورتكي بولگن.

"الله مرسيگه غلبه قازانيش و ينه جمهور رييس قرارگاهيگه قيتيشيگه ياردم بيره دي"، ديب ايتگن محمد بديعي ييغيلگنلرگه قره ته.

قاهره دن كيله ياتگن خبرلرگه قره گنده، پوليس حركت ني جلولش مقصديده نيل آرقه لي اوته ديگن كوپريك ني ياپيب، سيملي توسيقلر اورنتگن.