امنیتی پیمان مساله سی اوچون هند هیاتی کابل ییتیب کیلگن

هند حکومتی نینگ بیر گروپ هیاتی افغان رسمی لری بیلن ایکله تمان آره سیده گی امضالنگن امنیتی همکارلیک خصوصیده صحبت قیلینه یاتگنی خبر قیلینگن.

کابل گه کیلگن بوهیات نیمه مساله اوچون کیلگن لیگی عاموی خبر واسطه لری گه ایتیلمه گن. بیراق افغانستان مدافعه وزیرلیگی گه کوره، افغان تامانی بیلن افغانستان وهند مملکتی آره سیده گی امنیتی پیمان همکارلیک قیلیش مساله سی قنده ی لیگی باره سیده اوچره شگن.

بوهیات نینگ سفری، هند مملکتی نینگ ایچکی ایشلروزیری افغانستان گه آغیر قورال بیره آلمسلیگی نی ایتگن دن کیین عملگه آشماقده.

بوندن نیچه هفته آلدین، افغانستان جمهور رئیسی حامد کرزی هندگه بولگن رسمی سفری چاغیده بومملکتدن افغان ملی اردوسیگه آغیر قورال لریاردم بیریشی نی سوره گن ایدی، کرزی جنابلری تاماندن قیلینگن بو طلب یوزه سیدن هند رسمی لری بو خصوصده اویلب کوریش لرینی معلوم قیلگن ایدیلر، ایکی کون آلدین هند نینگ ایچکی ایشلر وزیری سلمان خورشید هندی، عاموی خبر واسطه لریگه هند مملکتی حاضرگی شرایطده افغانستان گه آغیر قورال بیره آلمسلیگی نی تیل گه آلگن ایدی.

اوشبواظهارات گه قره مسدن ییتیب کیلگن خبرلرگه کوره، هند مملکتی نینگ ایچکی ایشلروزیرلیگی ومدافعه وزیرلیگی دن عبارت بولگن بیرگروپ هیات افغانستان گه سفرقیلیب بومملکت رسمی لری بیلن امینتی ساحه سیده قنده ی همکارلیک قیلینیشی باره سیده صحبت اوتکزیشی ممکن .

افغانستان مدافعه وزیرلیگی نینگ سوزچیسی ظاهرعظیمی گه کوره، بو هیات افغانستان و هند آره سیده بولگن استراتیژیک پیمان چوکاتیده کیریتیلگن امینیتی همکارلیک توغری سیده افغان تمانی بیلن صحبت قیله دی"هندوستان افغانستان نینگ استراتیژیک دوستی بولگن وشونینگدیک بیز هنوستان مملکتی بیلن استراتیژیک پیماننی امضاله دیک، شونینگ چوکاتیده بیزنینگ همکارلیگیمیز دوام ایته دی، اینیقسه امنیتی ساحه ده هیچ قنده ی سست لیک بولمه گن، هیات نینگ هم، کیلیشی امنیت گه باغلیق کیلیشوواساسیده گی استراتیژیک مساله نینگ عملده اجرا ایتیلیشی خصوصیده بولگن ایدی". دییدی افغانستان مدافعه وزیرلیگی نینگ سوزچیسی ظاهرعظیمی

عظیمی جنابلری بو هیات نینگ سفری توغرسیده عاموی خبر واسطه لری، جریانگه قوییلمه گنی سبب، کوپراق معلومات بیرمه دی.

بوندن قریب ایکی ییل آلدین افغانستان بیلن هند مملکتی آره سیده استراتیژیک پیمان امضالنگن ایدی، اوشبو پیمان ده، هند حکومتی افغانستان نینگ ملی اردو وملی پولیس کوچلرینی تربیه لش وجهازلش دن علاوه بو کوچلری نی قابلیت لرینی آشیریش اوچون هم یاردم بیریشی سوزبیرگن ایدی.

کابل ده گی هند ایلچی خانه سی، بی بی سی گه ایتیشیچه، افغانستان گه سفرقیلگن، بوهیات افغان رسمی لری بیلن اوچره شگندن کیین قیته هند گه یول آلگن.