افغانستان عالي اوقوو درگاه لريگه يول تاپيش يا حصه بيريش لايحه سي وزيرلر كينگشيگه يوباريله دي

عالي اوقوو وزيرليگي نينگ اوشبو ينگي لايحه سيگه كوره، هر بير ولايت نينگ موفقيت قازان طلبه لري نينگ ساني اوشه ولايت نينگ جمعيتي و اوقيش ني بيتيرگن لري اساسيده چيكلنه دي.

افغانستان عالي اوقوو وزيرليگي بير لايحه ايشلب چيقيب، بو لايحه گه بنآ، هر ولايتده كانكور سيناوي ده عالي درگاه لرگه يول تاپگن لر اوشه ولايت نينگ جمعيتي و مكتب ني بيتيرگنلرنينگ ساني اساسيده، چيكلنه دي.

عالي اوقوو وزيرليگي نينگ طلبه لرايشلري بوييچه معاوني بري صديقي بي بي سي بيلن صحبت اوتكزيب، بير ولايتده كانكور سيناويده طلبه لر كوپ و باشقه سيده كم كامياب بوله ياتگني حق تلفليك حسابلنه دي. شو نقطه ء نظردن هر بير ولايت نينگ يريم جمعيتي و كامياب بولگن طلبه لري نينگ ساني گه مطابق هر بير ولايت نينگ سهمي معلوم قيلينگدن سونگ، سيناو بوليب اوته دي.

اما صديقي جنابلري، هر بير ولايتده چيكلنگن سان، حصه معناسني افاده لش ايمس ديدي.

اونگه كوره، اوشبو لايحه كيله سي كونلرده وزيرلر كينگشي گه يوباريليشي ممكن.

چون مذكور لايحه بير طرزالعمل صفتيده وزيركينگشي نينگ تصديقي دن سونگ، عملده جاري قيلينه دي.

صديقي جنابلري، عالي اوقوو وزيرليگي اوتگن ييلگي كانكور سيناوي نتيجه سي ني اعلان قيلگن سونگ، ولايت لرطلبه لري عالي بيليم درگاه لريگه عدالتلي روشده يول تاپيشي اوچون مدني جماعه چيليك، اولوسي جرگه اعضالري، صاحب نظرلر و بيرقطار بيليم يورت لر رييسلري نينگ همكارليگي بيلن مذكور لايحه ني توزيشني باشله دي دييدي.

اونينگ ايتيشيچه، افغانستان جمهور رييسي حامدكرزي نينگ دستوري بيلن عالي اوقوو وزيرليگي، معارف وزيرليگي و اجتماعي ايشلر وزيرليگي تمانيدن برپا ايتيلگن قوشمه سينمارده مذكور لايحه تصديقلندي.

اوتگن ييل اوزاق مسافه ده جايلشگن ولايت لردن كته سانده گي طلبه لرنينگ عالي اوقوو درگاه لرده قبول قيلينيشي و كته شهر لرده گي طلبه لرنينگ يول تاپه آلمه گني، معارف وزيرليگي نينگ اولوسي جرگه نماينده لري تمانيدن زبان پرستليك و ملتچيليككده عيبلندي.

ينگي لايحه گه كوره، كانكور سيناوي گه قتنه شه ديگن لر مكتب دوري نينگ آخرگي اوچ ييليده گي اورته چه نمره لري 65 فايز بوليشي كيره ك.

صديقي، اوشبو عمل شايسته ليك ني نظرده توتيب، قلابليك گه يول قويمه يدي دييدي.

اونگه كوره، كانكور سيناويده روي بيره ديگن اكثر قلابليكلر، معيارني تولديره آلمه يديگن طلبه لرتمانيدن يوز بيريشي ممكن.

او، كانكور سيناويده تينگسيزليكلر باعث كاميابليك و ناكامليك ني، تورلي خيل ولايتلرده ظلم ديب، هر بير ولايت نينگ كامياب لريني چيكلنتيريش، امتياز بيريشني افاده له مه يدي ديدي.

اوشونينگ ديك، اوشبو لايحه، عالي اوقوو وزيرليگي ني مملكت بويلب عدالتلي و صفتلي تعليم گه ايريشيشگه ياردم بيريشي ممكنليگي ني تاكيدله دي.

مذكور لايحه نينگ عملگه جاري قيلينيشي بيلن، هر بير ولايتده كانكور سيناوي نمره لري بوتكول اوزگريشي ممكن، اما صديقي جنابلري نمره لرني كانكور گه يول تاپيش اوچون يگانه شايسته ليك ديب بيلمه يدي.

اونينگ ايتيشيچه، فقطگينه نمره حسابگه آلينمه يدي، باشقه گپلر هم بار. ولايت خطرگه دوچ كيگلن. مسووليت سيز شخصلر اره لشه دي، تيگيشلي گروه لرنينگ همكارسيزليگي، كانكور سيناوي اداره سيده ييترلي درجه لي شخصلربولمه گني، كانكور سيناوي شفافليگي ني معما گه رو په ره قيلگن.