سحرگل نينگ بوكونگي حياتي قنده ي اوتماقده؟

سحرگل ماجراسي همه گه معلوم. اوشه ماجرادن كيين، كيچيك ياشلي سحرگل هندوستان گه يوباريليب، اوييرده گي كسلخانه لرنينگ بيريگه ياتقيزيلگن ايدي. زمان اوتيشي بيلن او ساغه ييب، بوتون زخملري مرهم تاپگن. سحرگل گه بير تقيم صحي خذمتلر بجريليشي اوچون او كابل شفاخانه لرينينگ بيريده هم دوالنگن ايدي.

ايندي ايسه او عياللرگه مخصوص خوفسيزليك خانه لرينينگ بيريده يشب كيلماقده.

بي بي سي بيلن بولگن صحبتيده سحرگل، كيله جكده رييس بوليش آرزوسي بارليگيني ايتگن. افغانستانده هيچ بير عيال اونينگ سرگذشتيگه اوخشه گن حادثه لرني باشدن كيچيرمسليگي و خاتين- قيزلرگه ياردم كورسه تيش اوچون هم، رييس بوليشيني عليحده تاكيدله يدي.

مكتب گه كيرگن سحرگل اوقيش و يازيشني كته قيزيقيش بيلن مشق قيله ياتگنيني ايته دي. او تورتينچي صنف اوقووچيسي. اوقيشني اورگنه ياتگني مثاليده آتي نينگ حرفلريني بيرمه- بير ايتيب چيقدي.

رييس بوليش بيلن بيرگه او ملكه لي ترجمان بوليشني هم ايسته يدي، كونگليده گي ايستكلريدن ينه بيري هم دوبي اولكه سيگه باريب سياحت قيليش. او دوبي ني يقيندن كورمه گن ليكن اوييرنينگ رسملريني هر مدتدن كوريب توريشيني ايته دي.

سحرگل عمر يولداشي نينگ آنه سي، آته سي و آپه سينينگ ايركينليككه چيققنيدن خواطيرده. اولرنينگ آزاد بولگنيني بيلگچ، قورقووگه توشگن سحرگل كورگن توشيني شونده ي تصويرله يدي:

"كيچه نماز اوقيب بولگندن كيين، اويقوم كيلمه دي، تسبيح آغدريب اولتيرسم اويقوگه كيتيب قاليبمن. توشيمده بير ايت ميني قوويب، نهايت اوميني ييب قويدي. ايرته سي اويغانگندن كيين، قيينانملرني آزادليككه چيققنلريدن خبر بولديم... ."

اما ايندي اولردن هيچ هم قورقمه يمن. زيرا اولگيدن كوره كوچلي بولگنمن. اوللري ميني زيرخانه ده سقلشر ايدي، ايندي امن اوييده من. بو ييرده تينچ يشه يپمن و اوزيمني حمايه قيليش كوچي مينده بار ديدي او.

بغلان ولايت مركزي پلخمري شهريده، بيش آيگچه زيرخانه ده ظلم و شكنجه آستيده سقلنگن اون بيش ياشلي سحر گلني، عمر يولداشي نينگ عايله سي ناجايز ايشلر قيليشگه اونده گن ايدي. بو عملدن باش تارتگن قيزه لاق نينگ تيرناقلري چيقَريليب، ييلكه سيگه شكست ييتگن ايدي. اونينگ قيينانه سي و باشقه ايكي عيال اوشبو مسئله گه دخلدار كيشيلر صفتيده توتقينگه آلينگن ايدي.

سحرگل نينگ توي قيليب، بغلانگه كيليشيدن بير ييل هم تولمه ي، اونينگ اوز آته- آنه سي قيزلريدن هيچ قنده ي احوال قيليشگه موفق بوليشمه گن ايكن. ايندي ايسه او كابلده تينچ يشب كيلماقده.