سحر گل:ميني خوار قيلگنلرنينگ خوار بوليشي ني ايسته ي من

اون ایکی ياشيده تورموشگه اوزه تيلگن سحرگل اوزيني يير توله ده سقلب، تيرناغ و ساچلريني ايلديزي بيلن سوغوريب آلگن قيناته، قين آنه و قين آپه سي نينگ بار - يوغي بير ييل نينگ ايچيده آزادليككه چيقه ريليشيدن ناراض.

سحرگل نينگ كيچميشي اوتگن ييلي بوتون دنياني لرزه گه سالگن و افغانستان نينگ اوزيده هم كيشي لرنينگ قهر و غضبلريگه سبب بولگندي. ياش باشي بيلن اوزيدن انچه كته كيشي گه ايرگه تيگيشگه مجبور بولگن سحرگل ايري و اونينگ يقينلري تمانيدن شفقتسيز قيناققه سالينه دي. اولر سحرگل ني يير توله ده آچ ـ نهار سقلشه دي، تيرناق و ساچلريني سوغوريب آليشدن تشقري، بدنيني سگريت چوغي بيلن كويديريشه دي. اوتگن ييلي افغان پوليسي اولاو ييتگن سحرگل ني قوتقه ريب آليشگه موفق بوله دي. مين سحرگل بيلن انه شو حادثه لردن 18 آي اوتيب اوچره شديم، حاضر 15 ياشده بولگن ياش كيلينچك نينگ بونچه ليك تيزليكده ساغه ييب كيتگني، توغريسي اوزيمني هم حيران قالديردي. دييدي مخبريميز سنجاي مجومدير. عالي محكمه حكمي افغانستان عالي محكمه سي اوتگن هفته سحرگل نينگ قصد دن آدم اولديريشده عيبلنيب، 10 ييلليك قماق جزاسي بيريليشي كوتيلگن قيناته، قين آنه و قين آپه سيني آزادليككه چيقه ريشگه قرار قيلدي. سحرگل نينگ كيچميشي ايان بولگچ، قاچيب كيتگن ايري هم كيينچه ليك تاپيلگن ايسه، ده، شو پيتگچه محكمه گه تارتيلگني يوق. قوليده گي دست روماليني بوره گنچه، سحرگل مينگه جوده قورقه ياتگني ني ايته دي. "مين محكمه نينگ حكمي ني ايشيتيب، جوده خفه بولديم. چونكه اولر قماقدن چيقسك، سيني اولديره من دييشگندي". "ايندي، ايتگنلريني قيليب، اوزيمدن توشيشه دي ديب خواطرده من". سحرگل نينگ امريكاليك حمايه چيسي كيمبيرلي موتلي محكمه حكميدن آغيز آچيب قالگني و حتي بوندن اوزي نينگ آگاه ايتيلمه گنيني ايته دي. "سحرگل بير باله بولسه، هيچ كيم بو كبي كويگه توشمسليگي كيره ك". "جوابگرلرنينگ قوييب يوباريليشلريگه هيچ بير اساس يوق. بير محكمه حكمي يوزه سيدن شكايت عريضه سي بيلن چيقه ميز"، دييدي سحرگل نينگ حمايه چيسي. حتي، افغانستان جمهور رييسي حامدكرزي هم بو ايشدن خواطرده ايكني و بو خصوصده سحرگل حقيده قيغوريب كيله ياتگن خاتين ـ قيزلر حقوقلريني حمايه ايتيش گروهي بيلن بولگني ني ايتدي. "اولر هم ميني ديك عذاب چيكيشگن" سحرگل بيلن صحبتيميز دوام ايتركن، او محكمه دن فقط بير نرسه ـ اوزيني قيناققه سالگن انسانلرني قماققه قيته ريب، جزالنيشي ني ايسته شيني ايتدي. "اولر ميني خوار و زار ايتيشدي. شو سبب دن مين هم اولرنينگ اوزيم ديك عذاب چيكيشلريني ايسته ي من"، دييدي سحرگل. قيزي نينگ باشيگه توشگن دهستلي كورگوليكلردن ينه حياتگه قيتيشي آسان كيچمه گن سحرگل حاضر اينگيب اوتيشي كيره ك بولگن ينه بير مشكلات قرشي سيده. باشقه تماندن، افغانستان ده طالبانگه اوخشش اوته عنعنه دار گروه لرنينگ تاثيرلري كوچيه باشلرايكن، سحرگل و قالگن افغان عياللري نينگ تقديرلريدن خواطرلر هم كوچه ييب بارماقده.