فاریاب حاکمی: بو ولایتده حتی ایرانلیک طالبلرهم موجود

فاریاب ولایتی نینگ ولایت حاکمی محمد الله بتاش بی بی سی اوزبیک خذمتی بیلن بولگن صحبتیده، اوزبیکستانلیک چیچین لیک حتی که ایران لیک عصیانچیلر مذکور ولایتده موجودلیگینی ایتدی. شونینگدیک بتاش جنابلری خوف سیزلیک وضعیتی اوتمیشلرگه قره گنده یخشی بولگنینی تیلگه آلدی.

حاضرگی کونده ، فاریاب ولایتی نینگ آلمار، قیصار، پشتونکوت، غورماچ تومنلریده طالبان عصیانچیلری انچه فعال بولیب، افغان امنیتی کوچلری و عصیانچیلر آره سیده توقنه شوولر یوزبیریب توره دی. بومساله ایسه قطار فاریاب لیک لرنی جدی خواطرلریگه سبب بولگن.

فاریاب یشاوچیلریدن اسماعیل ایوبی، بی بی سی اوزبیک خذمتی نینگ سوز سیزگه دستوریگه اشتراک ایتیب، میمنه خوف سیزلیگی بارسیده بولگن خواطرینی شوندی بیان ایتدی:"نه فقط چیککه منطقه لر بلکه میمنه یقینیده هم طالبان عصیانچیلری فعالیتی آرتیب بارماقده . میمنه شهریدن بیش کیلومتر اوزاق لیکده جایلشگن امام صاحب ناملی کلینیک نیچه کون یاپیلدی. طالبان عشر زکات آله دی، کوپینچه مکتب لر طالبان تمانیدن نظارت ایتیله دی. بو ایسه امنیت نینگ کوندن کونگه یمانله شیب باره یاتگنینی کورسه ته دی." دیدی بو شخص.

فاریاب ولایتی نینگ ولایت حاکمی محمد الله بتاش، ایریم تومنلرده طالبان فعالیتی موجود لیگینی تن آلیب بیراق طالبان عشرو زکات آلیب حتی ساغلیک مرکزلرنی یاپیشگه قادر بولگن دیگن ادعا لرنی رد ایتدی.

عینی حالده فاریاب ولایتی نینگ ولایتی کینگاش رئیسی رحمت الله تورکستانی، مردم همکارلیگی بیلن برچه مکتب لر ایشیکلری آچیق ایکنینی ایتیب، افغان امنیتی کوچلری چوکاتیده ایش بیلرمان کیشیلر جایلشتریلسه، بوکبی قینچلیک لر حل بولیشگه امید بیلدیردی، بیراق تورکستانی جنابلری چیککه تومنلرده طالبان فعالیتی آرتیب باره یاتگنینی تن آلگن و اوشبو تومنلرده باریش اوته قیین بولیب قالگنیدن تشویش بیلدیرگن.

باشقه تماندن بتاش جنابلری، فاریاب ولایتی نینگ غورماچ کبی تومنلریده اوزبیکستان لیک، چیچین لیک وحتی ایران لیک عصیانچیلر فعالیت قیلیب کیله یاتگنینی تاکیدله دی. همده ولایت حاکمی فاریاب ولایتیده موجود ناتینچلیک لرنینگ آلدینی آلیش اوچون محلی پولیس کوچلری سانی کوپیتریلیشی کیره ک لیگینی تاکیدله دی، اونگه کوره محلی پولیس کوچلری فعالیتی یخشی نتیجه بیرگن، بیراق مرکزی حکومت بو کوچلر سانینی کوپیتیریشگه اعتبار بیرمه یدی.