كريم خرم: امريكا و پاكستان، افغانستان بولينيشيگه فتنه توزماقده

Image caption كريم خرم، امريكا و پاكستان افغانستان ني بوليشگه فتنه توزه ياتگني ني ايتگن.

افغانستان جمهور رييسليك اداره سي كاتبي كريم خرم، امريكا و پاكستان افغانستان ني بوليشگه فتنه توزه ياتگني ني ايتگن. افغانستان خصوصي يك ناملي تلويزيونی بيلن صحبتلشگن خرم جنابلري، قطرده طالبان اوچون نماينده ليك آچيلگني، افغانستان ني بوليش اوچون فتنه ايكني ني بيلديرگن.

اما هنوز گچه امريكا و پاكستان تماني جمهور رييس كرزي كاتبي نينگ بو سوزلريگه بيرار نرسه ديمه گنلر.

جمهور رييسليك سرايي افتيدن جيم، اما ايريم خبر سراييده گي لرني تينچسيزلنتيرگن. قدرت ني تقسيملش باره سيده پيدا بولگن ميش ميش لر، جمهور ريسليك سرايي ني هم تشويش گه سالگن. جمهور رييس كرزي نينگ كاتبي و اونگه يقين شخص كريم خرم، امريكا و پاكستان افغانستان گه قرشي فتنه توزه ياتگني دن گپيرگن.

بو افغانستان دولتي نينگ امريكا گه قرشي اينگ آچيق سوزلري دير. اوتگن اون ييل ايچيده امريكا افغانستانده غلبه قازانالمه گن دييدي، خرم جنابلري. او، كابل و واشينگتن اورته سيده گي خوفسيزليك كيليشوونامه باره سيده پيدا بولگن كيليشماوچيليك دن هم سوز يوريته دي.

امريكا و قطر پاكستان نينگ همكارليگي بيلن كابل رسميلريني اولا چوچيتدي، كيينه ايسه قتيق شبهه لنتيردي. قطرده طالبان اوچون بير حكومت نامي آستيده سياسي نماينده ليك آچيلگني، جمهور رييس كرزي ني خواطرگه سالدي.

اوتيز ميليون جمعيت گه ايگه بولگن افغانستان بوندن 166 ييل آلدين ايجاد ايتيلگن. تورلي قوملر تورلي مدنيت و مذهبلر بيلن بو مملكت ده يشب كيلماقده. ملي بيرليك اوشبو قوملرنينگ بير جايده يشب كيلگني گه يگانه دليل بولگن.

بيرقطار افغان تحليلچيلري، ناتو بيلن يقينلش، مملكت نينگ بولينيشي گه توسيق بوله آليشي ممكنليگي ني ايتماقده لر.

افغانستان نينگ اوز تقديريني راستلب آليشگه، اوزاق كونلر كيره ك. ايچكي و خارجي سياستچيلر، خيلمه خيل، گاهيده مخالف و گاهي هم موافق مقصدلريني سورماقده.