افغانستان دولتي، ناتوكوچلريني 70 ميليون دالرجريمه تولشگه مجبورله گن

Image copyright AFP

افغانستان حكومتي، ناتو كوچلري مملكت گه آليب كيلگن جهازلري نينگ ساليق تولش حجتلري ني ترتيب دن اوتكزمه گنليكلري اوچون، 70 ميليون دالر جريمه تولشي كيره كليگي ني ايتگنلر. بو قرار مملكت وزيرلر كينگشي تمانيدن قبول قيلينگن. شو مسله افغانستان بندرلريده ناتو كوچلري نينگ جهازلري آرتيلگن يوزلب كانتينرلري نينگ توختب قاليشي هم سبب بولگن. ماليه وزيرليگي رسميلرياوتگن اوچ ييل ايچيده افغانستان گه آليب كيلينگن ناتو گه تيگيشلي ييتميش مينگ يوك، ترتيب دن اوتكزيلمه گن، شو سبب دن اولر جريمه توله مسدن مملكت چيگره لريدن چيقيب كيته آلمسليگي ني ايتگنلر. اوشبو مسله امريكا و افغانستان ارا تره نگليكلرگه سبب بوليب، ايكله مملكت رسميلري مذاكره آليب بارماقده لر.

افغانستان وامريكا اورته سيده ينه بير ينگي جنجل پيدا بولگن. بو بار، ناتو كوچلري تمانيدن افغانستان حكومتيگه 70 ميليون دالر جريمه توله مسليك جنجلي دير. افغان رسميلري ناتو سونگي اوچ ييل ايچيده افغانستان گه ييتكزيكن 70 مينگ يوك نينگ باجخانه حجتلريني ترتيبدن اوتكزمه گني باعث، قانون يوزه سيدن جريمه قيلينگني ني ايتماقده لر. اولر گه كوره، اوشبو قرار وزيرلر كينگشي تمانيدن قبول قيلينگن. ماليه وزيرليگي رسميلري، جريمه توله نيلمه گن تقديرده، ناتو كوچلري اوزي نينگ حربي جهازلري ني مملكت چيگره لريدن آليب چيقه آلمسليگي باره سيده آگاه لنتيرماقده لر. ماليه وزيرليگي سوزچيسي عبدالقادر جيلاني:"ايكي اوچ ييلدن بيري اولر 70 مينگ دي يك ني ترتيب دن اوتكزمه گنلر. اولر افغانستان دولتي گه 70 ميليون دالرتوله شي كيره ك. اگر اوتوله مسه لر وزيرلر كينگشي بوحقده قرار قبول قيله دي، اوپيت بيز جنجل قيلمه ي ميز. ناتو كوچلري افغانستان اوز جهازلري ني آليب چيقه ديگن بولسه، اولرنينگ هر بير موتري محافيت نامه گه ايگه بوليشي كيره ك". افغان رسميلري، ناتو تمانيدن مذكور مبلغ نينگ توله نيلمه گني، اوشبو كوچلرنينگ يوزلب كانتينر يوكلري جنوبي، شرقي و شمالي بندرلريده توخته تيب قوييليشي ممكنليگي ني تاكيدله گنلر.

اوشبو مسله ناتو كوچلري قوماندانلريني هوا ترانسپورت يوللريني تيكشيريشيگه مجبورله گن. ليكن بو مسله كوزه تووچيلرگه كوره، مينگلب دالر خرجت كوته ريب، اوني تولش امريكا اردوسي اوچون آغير توييله دي.

ماليه وزيرليگي سوزچيسي، جهازلر هوا يوللري آرقه لي آليب اوتيلگني تقديرده هم، ناتو بو جريمه ني تولشگه مجبور دييدي:"بو عمومي بير جريمه. اوني توله شي كيره ك. اولر هوا بوله ديمي، يا ييردن، حجتلريني ترتيبگه ساليشلري كيره ك". رسميلر، بو معما نينگ حلي اوچون كابلده افغان و ناتو قوماندانلري اورته سيده مذاكره لر دوام ايته ايتگنيني معلوم قيلگنلر. ناتو كوچلري بوحقده فكر بيلديريشدن باش تارتيب، مسله ني حل ايتيش اوچون سعي و حركت قيله ميز ديگنلر.