بيليم يورتلرده ينگي نصاب جاري قيلينه دي

Image copyright BBCPersian.com
Image caption بيز بو ييل تورلي بيليم يورتلر فاكلته سي نينگ كريكولملريني ترقه تيشگه تيارله ديك. بوندن كيين مملكت بويلب ينگي كريكولم تطبيق ايتيله دي.

افغانستان عالي اوقوو وزيرليگي ينگي كيريكولم يا تعليم نصابي ني ايشلب چيقيب، ايشگه جاري قيليشيني نظر ده توتگن. اوشبو وزيرليك رسميلري، بوندن آلدينگي ايسكي كيريكولم هر بير بيليم اداره سي تمانيدن تيارلنيب، هيچ قنده ي معيارگه برابر بولمه گني ني ايتماقده لر. عالي اوقوو وزيرليگي بير ييل آلدين مملكت بيليم يورتلريده گي ايسكي كيريكولم ني بيكار قيليش و اونينگ اورنيده ينگي و زمانوي كيريكولم ني ايشگه سالينيشي ني اعلان قيلگن ايدي. ايتيليشيچه، مذكور كيريكولم دولت بيليم يورتلريدن تشقري خصوصي تعليم موسسه لريده هم ايشگه سالينه دي. عالي اوقوو وزيرليگي رسميلري كابلده بير انجمن اويوشتيريب، ينگي كيريكولم يا تعليم نصابي مملكت بيليم يورتلريده جاري قيلينيشي ني اعلان قيلدي. مملكت عالي اوقوو وزيري عبيدالله عبيد، ايسكي كيريكولم لرنينگ اوزاق دوردن بيري ايشله تيب كيلينگني ني، عالي اوقوو وزيرليگي اوچون كته معما ايكني ني ايتيب، زمانوي و همه جهتدن معياري شكلده ايشلب چيقيلگن بو ينگي كريكلوم ايشگه سالينيشي بيلن، برچه معمالر برطرف ايتيليشي ممكنليگي باره سيده تاكيدله دي. او، ينگي كيريكولم بو ييل ايشگه سالينيشي ني ايتدي":بيز بو ييل تورلي بيليم يورتلر فاكلته سي نينگ كريكولملريني ترقه تيشگه تيارله ديك. بوندن كيين مملكت بويلب ينگي كريكولم تطبيق ايتيله دي. بو نه فقط 31 ته دولت بيليم يورتلريده ايشگه سالينه دي، بلكه خصوصي تعيلم موسسه لرهم ايشله تيشلري ممكن. نصاب، اكادميكي نقطء نظردن همده زمانوي لحاظ دن و شرايطگه ماس قيلينيب تيار لنگن". عبيد جنابلري، ينگي كيريكلوم يا تعليم نصابي ايشلب چيقيليشي اوزاق وقتلردن بيري لايحه لشتيريليشي نظرده توتيليب كيلگني ني تاكيدله دي. مملكت بيليم يورتلريده ينگي كيريكولم ايشگه سالينر ايكن، بونگه استاد و طلبه لر قنده ي فكري وملاحظ بيلديريشماقده لر. بلخ بيليم يورتي استاذي امان الله مونس، بوندن آلدين هر بير بيليم يورت نينگ اوستاذلري فاكلته لر اوچون عليحده نصاب يا كيريكولم تيارلب، تدريس قيلردي و هيچ قنده ي معياري كيريكولم موجود ايمس ايدي، ينگي كريكولم معياري شكلده تيارلنگن بولسه استاد و طلبه اوچون فايده لي دييدي. استاد مونس، ينگي كيريكولم دولت بيليم يورتلريگه قنچه ليك ثمره لي بولسه، خصوص تعليم موسسه لريگه هم ثمره لي خذمت قيليشي ممكنليگي ني تاكيدله ماقده. عالي اوقوو وزيرليگي رسميلري، ينگي نصاب، طلبله لرنينگ استعدادي ني اوسديريش و اولرني ملكه لشتيريشده كته خذمت قيليشي ني ايتماقده لر. اولر، ينگي كيريكولم بيليم يورتلرده تدريس قيلينيشي بيلن، ينگي بير اصلاحات وريفورم اورته گه كيليشي ممكنليگيني تاكيدله ماقده لر.