دمپسي: افغانستان وامريكا ارا خوفسيزليك كيليشوونامه اكتبر گچه انيقلنيشي كيره ك

Image caption دمپسي جنابلري اوتگن كون كيچقرون جمهور رييسليك سراييده حامدكرزي بيلن اوچره شدي.

دمپسي جنابلري اوتگن كون كيچقرون جمهور رييسليك سراييده حامدكرزي بيلن اوچره شدي. امريكا اردوسي قوشمه كوچلر رييسي جنرال مارتين دمپسي، اوزي نينگ كابلگه قيلگن سفريده، افغانستان وامريكا ارا كيليشوو نامه نينگ تقديريني كيله سي اكتبرگچه انيقلشيني تاكيدله دي. دمپسي جنابلري جمهور رييس كرزي بيلن اوچره شگنيدن سونگ، امريكا نينگ كابلده گي ايلچيخانه سيده ژورناليستلر بيلن اوچره شيب، ناتو كوچلري ماموريتي افغانستانده اوز يكونيگه ييتمسدن آلدين كيليشوو نامه مسله سي حل ايتيليشي كيره كليگي باره سيده تاكيدله دي. اونگه كوره، حربي نقطه ء نظريدن، اكتبر آييگچه خوفسيزليك كيليشوونامه چهار چوبه سيده ايكله تمان كيله جك باره سيده يخشي معلوماتگه ايگه بوليش كيره ك. او" بيز 2014 ييل اكبرآييگچه يعني 90 كوندن آلدين مستحكم چهار چوب صفتيده قبول قيليشيميز كيره ك"ديدي. جمهور رييس كرزي اداره سي تمانيدن امريكا اردوسي قوشمه كوچلر رييسي بيلن ديدارلش آرتيدن بيانات نشر ايتيلدي، اما بياناتده افغانستان جمهور رييسي كيليشوو نامه قطار شرط لر اساسيده امضالنيشي ممكنليگي ني ايتيلگن. اوشبو بياناتگه كوره، كرزي جنابلري دمپسي بيلن اوتكزگن اوچره شوويده كابل و واشينگتن ارا اوزاق مدتلي كيليشوو نامه امضالشگه قيزيقيش كورستگن. البته اوشبو قيزيقيش مملكت ده صلح تامينلنيشي، خوفسيزليك كوچلر كوچه يتيريليشي و بيرليك ايجاد ايتيليشي بيلن قيد قيلينگن. امريكا اردوسي كوچلري رييسي شونينگ ديك، امريكاليك كوچلرني افغانستان دن آليب چيقيش دستوري اونينگ قوليده ايمسليگي ني تاكيدله دي. افغانستانده حاضر 68 مينگ امريكاليك عسكر موجود. بوندن آلدين امريكا بيرقطار عاموي اخبارات واسطه لري كابل و واشينگتن ارا خوفسيزليك كيليشوونامه امضالنمه گن تقديرده، امريكا رسميلري افغانستاندن اوزي نينگ حربي لريني بوتونلي روشده آليب چيقيشي حقيده اويله شي ممكنليگي ني ني ايتگن ايديلر.مارتين دمپسي، مين اورين صفر دييه آلمه ي من.

ايكله مملكت ارا خوفسيزليك كيليشوونامه امضالنيشي مسله سي كيچيكتيريلگنيدن كيين، بو امريكا اردوسي قوشمه كوچلري رييسي نينگ افغانستانگه قيلگن ايلك سفري حسابلنه دي. قطر پايتختي دوحه ده طالبان اوچون نماينده ليك آچيليشي آرتيدن، جمهور رييس كرزي امريكا نينگ عملي و لفظي اورته سيده ضديت بارليگي ني ايتيب، افغانستان تمانيدن مذاكره لرني كيچيكتيردي. بوندن آلدين جمهور رييس كرزي باربار طالبان كيليشوومذاكره لراوچون انيق آدرس گه ايگه بوليشي كيره كليگي ني تاكيدلب كيلگن، اما اداره آچيليشيدن آلدين اوني فتنه ديه توصيفله دي. طالبان نينگ دوحه ده گي نماينده ليگي حاضر وقتينچه ليك ياپيلگن