سيلاولر مستقل كميسيوني: سيلاولرهمده تشكيل وصلاحيتلرقانونلري اساسي قانون گه ضد

افغانستان سيلاولر مستقل كميسيوني مسووللري، سيلاولر تشكيل و صلاحيتلرقانوني نينگ بير قطار ماده لري اساسي قانون گه ضد ايكني ني ايتگنلر.

اولر، اساسي قانون گه بنآ، كميسيون اعضالري جمهور رييس تمانيدن تعيينلنيشي كيره ليگي ني ايتيب، سيلاولر قانوني بير ييل سيلاولر اوتكزيلمسدن آلدين، ملي كينگش نينگ دستوريگه كيتريتيلمسليگي كيره كليگي ني هم تاكيدله گنلر. سيلاولر قانوني و سيلاو صلاحيتلري همده تشكيلي تصديقلنگني، كوپچيليك آدملر تمانيدن خوش قرشي لنگني گه قره مه ي، سيلاولر مستقل كميسيوني نينگ آلتي اعضاسي اونينگ بيرقطار ماده لري مملكت اساسي قانونيگه ضد ايكني ني ايتماقده لر. اوز همكارلري طرفيدن سوزگه چيققن سيلاولر مستقل كميسيوني معاوني عبدالخاق حسيني، اساسي قانون بنآ، حكومت يوقاري مرتبه لي اعضالري جمله دن بو كميسيون اعضالري جمهور رييس تمانيدن تعيين ايتيليشي كيره ك، ليكن سيلاولر تشكيل و صلاحيت لر قانوني نينگ بير ماده سي بو ايش ني باشقه بير كميته گه تاپشيرگن دييدي:"اساسي قانون نينگ 109 ماده سي ده، ايكله مجلس، ايش دورلريگه بير ييل قالگن بولسه، سيلاولر و صلاحيتلر قانوني همده سيلاولر گه عايد بحثلرني اوز دستورلريگه كيريته آلمسليكلري باره سيده آچيق ايتيلگن. اولر بو قانون ني اوز منفعتلريگه قره تيب تصديقله گنلر". حسيني جنابلري، اساسي قانون گه اساسآ، سيلاولر گه تيگيشلي قانونلر اوستيده ايشلش جرياني بير ييل سيلاولر اوتكزيلمسدن آلدين، ملي كينگش نينگ دستوريگه كيريتيلمسليگي كيره كليگي ني تاكيدله ماقده. اونگه بو قانونلر سيلاولر بوليب اوتيشيگه فقطگينه سيكيز آي قالگن بير پيتده ايكله مجلس تمانيدن تصديقلنگن. اما ايريم شخصلر، كميسيون اعضالري اوز لوازملري نينگ قولدن بيريشي احتمالي حقيده خطر پيدا بولگن بيرپيتده، شو كبي اظهاراتلرني بيلديره ياتگني ني ايتماقده لر. سيلاولر مستقل كميسيوني معاوني شونينگ ديك، ملي كينگش ني سيلاولر گه تيگيشلي قانونلرني سيلاولر شفافليگي اوچون ايمس بلكه اوز شخصي منفعتلريني كوزده توتيب تصديقلگني باره سيده تنقيد ايتدي. او، ملي كينگش اعضالريدن بيرقطاري، سيلاولر كميسيونيده اعضا بوليشگه سعي و حركت قيله ياتگني باره سيده هم تاكيدله دي.