جوزجان ينگي حاكمي عبدالرشيد دوستم دن همكارليك و مصلحت كورستيشي ني سوره دي

Image caption بايمراد قوينلي ، جوزجان اهاليسي معمالريني برطرف ايتيش و قويله يليكلر يره تيشي ني وعده قيلگن.

جوزجان ولايتي اوچون دولت تمانيدن تعيينلنگن ينگي حاكم بوگون اهاليگه تنيتشيريليب، ايش باشله گن.

ينگي حاكم، جوزجان آلدينگي حاكمي محمدعالم ساعي، ملي جنبش رهبري جنرال عبدالرشيد دوستم ارا پيدا بولگن جنجل آرتيدن شبرغان ني ترك ايتيشگه مجبور بولگن دن سونگ، ييتيب تعيينلنگن.

بو حاكم ايسه، جوزجان اهاليسي معمالريني برطرف ايتيش و قويله يليكلر يره تيشي ني وعده قيلگن.

عين حالده، بو ولايت نينگ آقچه تومنيده پارتلش يوز بيريب، اوچ كيشي اوليب يره لنگن.

ينگي حاكم بايمراد قوينلي خوفسيزليك ني تامينلش، اقتصاد رواجلنيشي، ايش زمينه لريني مهيا قيليش و عياللرگه قرشي زوره وانليك ني برطرف ايتيشده جدي حركت قيليشي ممكنليگي ني تاكيدله دي:"مين بو ييرگه حاكم صفتيده كيلمه گن من، بلكه سيزلرنينگ خادملرينگيز صفتيده كيلگن من. مين سيزلرنينگ فرزنديگيز ايناغه نگيز صفتيده جوزجان ده سيزلر بيلن بيرگه خذمت قيليشگه حركت قيله من".

او شونينگ ديك، جوزجان اهاليسي آلديده تورگن اينگ قلتيس سوو ويرق معمالري ني تيز راق حل قيليشگه حركت قيليشيني وعده قيلدي.

بايمراد قوينلي جنابلري، جوزجانده اوزي نينگ ايلك رسمي چيقيشيده، ملي جنبش رهبري جنرال عبدالرشيد دوستم دن جوزجان ولايتيده حكومت ايشلري نينگ آلغه سيلجيشيده او بيلن همكارليك و مصلحت كورستيشي ني سوره دي.

باشقه تماندن جوزجان ولايتي ولايت كينگش رييسي عبدالحي حيات ولايت اوچون ينگي حاكم تعيينلنگي ني آلقيشلب، ينگي حاكم مليت وقوم ديمه ي، همه گه يكسان وثمره لي خذمت قيليشي لازمليگي باره سيده تاكيدله دي:"بيزلر نيمه ايشلر ني عملگه آشيرديك؟ و نيمه قيليشميز كيره ك. وطنداشلر بو ايناغه ميز ولايت كينگشي دن سنا مجلسيگه يول آليب، سنا طريقيدن ولايت گه يول تاپگني ني آلقيشله ي من".

او ينگي حاكمدن، جوزجان ولايتي ده گي معمالرني برطرف ايتيشده، كيره كلي چاره تدبيرلر كوريب چيقيشي ني سوره دي.

بوندن قريب بير آي آلدين جوزجان سابق حاكمي محمدعالم ساعي و جنرال دوستم قوريقچيلري اورته سيده روي بيرگن توقنه شوو آرتيدن جنرال دوستم طرفدارلري نينگ كوچه گه چيقيب، نمايش اويوشتيريشگه سبب بولدي.

جنرال دوستم و آلدينگي حاكم ارا پيدا بولگن تره نگليك دن بير آي اوتگن دن سونگ، جمهور رييس كرزي شنبه كوني بير دستور صادر ايتيب، جوزجان اهاليسي نينگ سنامجلسيده گي نماينده سي بايمراد قوينلي ني جوزجان حاكمي صفتيده تعيينله دي.

ايتيليشيچه، آقا محمد اوغلي بايمراد قوينلي توركمن قوميدن بوليب، جوزجان نينگ آقچه تومني دن بولگن. او اوتميشده سنا مجلسيده جوزجان اهاليسي نينگ سناتوري صفتيده وظيفه بجريب كيلگن.

عين حالده، جوزجان ده ينگي والي ايشله باشله ياتگن بير پيتده ولايت نينگ آقچه تومني ده پارتلش يوز بيريب، اونينگ عاقبتيده بير پوليس وايكي تينچ اهالي هلاك و باشقه اون نفر جراحتلندي. آقچه تومني خوفسيزليك مسووللري، پارتلش آقچه بازارده گي موترلر بيكيتيده روي بيرگني ني معلوم قيلدي.

Бу мавзуда батафсилроқ