ملي اردو عملياتيده،اوزبیک، عرب و پاکستان لیک جنگري نابود قيلينگن

Image caption بو عمليات ننگرهارنينگ حصارك، لوگر نينگ ازره و پكتيا نينگ اريوب تومنلريده باشلنگن ايدي.

افغانستان مدافعه وزيرليگي، مملكت بويلب سيمرغ نامي آستيده اوتكزيلگن حربي عمليات نتيجه سيده اكثريتي خارجيلردن عبارت بولگن 140 دن آرتيق عصيانچي نابود قيلينيب، كميده 20 ته سي قولگه آلينگني ني ايتگن.

مذكور عمليات بوندن بير آي مقدم افغانستان شرقي و جنوب شرقي حدوديده گي اوچ تومنده باشلنگن ايدي.

بو عمليات ننگرهارنينگ حصارك، لوگر نينگ ازره و پكتيا نينگ اريوب تومنلريده باشلنگن ايدي. عملياتدن مقصد، مذكور تومنلرني قوراللي مخالفلر دن تازه لش بولگن.

هوا كوچلري توپچي قوه سي حمايه سي بيلن اوتكزيلگن مذكور عملياتده افغانستان ملي اردوسي تورت يوزگه يقين عسكري اشتراك ايتگن.

مدافعه وزيرليگي سوزچيسي جنرال ظاهر عظيمي، بوني مملكت ده افغان كوچلري تمانيدن مستقل روشده اوتكزيلگن اينگ كته عمليات ايكني ني توصيفله دي.

اونينگ عاقبتيده فقطگينه ازره و زازي اريوب تومنلريده 140 دن آرتيق جنگري هلاك بوليب 20 گه يقين قولگه آلينگني ني معلوم قيلدي"140 دن آرتيق دشمن نابود قيلينگن. كميده 20 نفر قولگه آلينگن. بيرمقدار قورال اسلحه وايشانيب بولمه يديگن اونلب توزه تيلگن سقال اولرنينگ آلديدن قولگه توشيريلگن".

عظيمي جنابلري، نابود ايتيلگن جنگريلرنينگ اكثريتي پاكستانليك، چيچينليك، عرب و اوزبيكستانليك بولگن دييدي.

اوشبو عمليات ده ملي اردو اوچ عسكري هم حياتيني يوقاتگن.

افغانستان مدافعه وزيرليگي، اوتگن اون ييل ايچيده لوگرولايتي ازره تومني، ننگرهار نينگ حصارك و پكتيا نينگ زازي اريوب تومنلري نينگ اكثر منطقه لريده جنگريلر جايلشيب آلگنلر، حاضر ايسه مذكور منطقه لر قيته دن دولت تصرفيگه اوتگن دييدي.

ايتيليشيچه، سيمرغ نامي آستيده گي عمليات نينگ ايكينچي باسقيچي هم تيز آره ده مذكور تومنلرده باشلنه دي، اما مداقعه وزيرليگي خوفسيزليك مسله لر سبب اونينگ تفصيلاتي باره سيده بيرار نرسه ديمه گن.