پاكستانده طالبان 240 محبوسني قماقدن آزاد ايتدي

طالبان جنگريلري پاكستان شمالغربيده گي تورمه گه هجوم اويوشتيريب، 240 دن آرتيق محبوس ني آزاد قيليشگن.

بوحقده معلومات ترقتگن رسميلرگه كوره، ديره اسماعيل خان شهريده گي تورمه گه قيلينگن هجوم دوشنبه كوني يريم تونده ييريك پارتلشلربيلن باشلنگن.

قوراللي كيشلر سونگره قول بمبه لري و اتوماتيك قوراللردن اوت آچگنلر.

مذكور قماقخانه ده يوزلب طالب و منع قيلينگن گروه اعضالري سقلنگن.

ييتميشگه يقين هجومچيلرنينگ بعضيلري اوستي باشيده پوليس كييملري بوگن.

دييرلي تورت ساعت دوام ايتگن هجومده 12 كيشي، جمله دن آلتي پوليس منصبداري هلاك بولگن.

شهر كميساري مشتاق جدون 243 نفر آزاد قيلينگن توتقونلر آره سيده خودكشليك پارتلشلري و ييريك هجوملرني اويوشتيريشده عيبدار تاپيلگن اشدي جنگريلر بولگني ني ايتدي.

جناب جدون گه كوره، هجومچيلر اوز دوستلري نينگ آتلريني آواز كوچه يتيرگيچلرده ايتيب چيقيرگنلر.

اون تورت محبوس كيچراق پوليس تمانيدن قيته قولگه آلينگن. پوليس قالگن محبوسلرني آولشگه كيريشلرايكن، ديره اسماعيل خان شهريده كوميندتليك ساعتي اورنه تيلگن.

رويتر خبر آژانسي مخبري كترين هوريلدنينگ بي بي سي گه ايتيشيچه، هجوم اوته يخشي تيارلنگن بولگن بوليب، هجومچيلر "برق لين لريني پارتلتگنلر، ديوارلرني بوزگنلر و خوفسيزليك كوچه لريگه پيستيرمه دن هجوم قيلگنلر".

جناب جدون حاضرگه قدر قماقخانه ده اورنه تيلگن 14 ته ماين خوفسيزلنتيريلمه گنيني بيلديردي.

محلي يشاوچي نينگ بيلديريشيچه، هجوم شو قدر كوچلي بولگن كه، "حدودده گي هر بير اوي تيتره ب كيتگن".

هجومچيلر "الله اكبر" و " يشه سين طالبان" ديه هيقيرگنلر.

رسميلرنينگ ايتيشيچه، حكومت اوتگن بير نيچه هفته دواميده قماقخانه هجومگه آلينيشي باره سيده تهديدلر آلگنلر.

پاكستان طالباني واعظي شاهدالله شاهد هجوم اوچون مسووليتني بوينيگه آلگن. او 300 نفرچه محبوس آزاد قيلينگني ني ايتدي.

اوتگن ييل اپريلده بنو شهريده گي تورمه گه اويوشتيريلگن هجومده يوزلب محبوس آزاد قيليندي.

مخبرلرگه كوره، حكومت ايندي جنگريلر دير اسماعيل خانده هم خوددي شونده ي هجوم ني عملگه آشيريشگه قنده ي قادر بولگنلري باره سيده قيين سواللرگه يوز توته ديلر.

طالبان محبوسلرني آزاد قيليش بوييچه حكومت بيلن مذاكره آليب بارگندن كوره، تورمه لرني بوزيب او صفداشلريني آزاد قيليش استراتيژيسي ني افضل بيله ديگن كورينه دي.

اوتگن آي، اسلام آباده گي مخبريميزگه كوره، پوليس كراچي ده گي قماقخانه گه هجوم اويوشتيريشگه شي لنه ياتگن طالبان اعضالريني قولگه آلگنيني دعوا قيلگندي.

دير اسماعيل خان پاكستان نينگ تاغلي قبيله لر حدودده گي خيبر پختونخواه ولايتيده جايلشگن.

آخرگي هجوم پاكستان رسميلري مملكت نينگ ينگي جمهور رييسي ني تعيينلش گه تيارلنه ياتگن وقتگه توغري كيلماقده.

ينگي جمهور رييس سه شنبه كوني پارلمان و تورت ولايت كينگشلري تمانيدن آصف علي زرداري اورنيگه تعييلنه دي.