عیاللرنی سیلاو لرده حصه قوشیشی اوچون ینگی لایحه

Image caption سيلاولرده عياللرنينگ قتنه شيش موضوعي، عياللر وزيرليگي و اولوسي جرگه نينگ عياللر ايشلري بوييچه كميسيوني ني حاضر دن باشلب خواطرگه سالگن

افغانستان عياللر وزيرليگي و اولوسي نينگ عياللر ايشلري بوييچه كميسيوني سيلاولرده عياللرحضوريني آشيريش اوچون، بير لايحه ايشلب چيقييب سيلاولر مستقل كميسيوني گه يوباردي. مذكور لايحه ده، اويمه اوي عياللرني آگاه لنتيريش ترغيبات كمپايني، سيار عياللر آرقه لي خاتين قيزلرگه آواز بيريش كارتلريني ترقه تيش، ايرككلر تمانيدن عياللر ناميدن بيريله ديگن آوازلرني آلديني آليش وباشقه حالتلر كيريتيلگن. افغانستان سيلاولر مستقل كميسيوني لايحه ني خوش قرشيلب، امكانگه قدر اوني عملده جاري قيليشيني ايتگن. سيلاولرده عياللرنينگ قتنه شيش موضوعي، عياللر وزيرليگي و اولوسي جرگه نينگ عياللر ايشلري بوييچه كميسيوني ني حاضر دن باشلب خواطرگه سالگن. بوندن بير نيچه كون مقدم سيلاولر مستقل كميسيوني، حاضرگه قدر آواز بيريش كارتلرني قولگه كيريتگن لردن فقطگينه 20 فايزي عياللر ايكني ني اعلان قيلدي. مملكت نينگ تينچ سيز منطقه لريده آواز بيريش كارتلريني قولگه كيريته ياتگن عياللر ساني جوده هم آ‍ز ايكني باره سيده تشويش موجود. موجود معمالرني برطرف ايتيش اوچون عياللر وزيرليگي و اولوسي نينگ عياللر كميسيوني بيرگه ليكده سيلاولر مستقل كميسيوني گه ايشلب چيقيلگن لايحه سيني تاپشيرگن. اولوسي جرگه نينگ عياللر ايشلربوييچه كميسيوني رييسي فوزيه كوفي:"عياللرنينگ آواز بيريش مركزلري قانونده وقتي قيد ايتيلگن وقتگچه آچيب قويلسين. چونكه عياللر نينگ ايش و مشغولاتلري كوپليگي باعث، آواز بيريش محللريگه ييتيب باره آلمه يديلر. عياللرنينگ آواز بيريش مركزلري اولر استقامت قيله ديگن محللرده آچيلسين.سيلاولر جريانيده آواز بيرووچيلر و نامزد عياللر همده مركزلرخوفسيزليگي تامينلنلن سين". خانم كوفيگه كوره، آلدينگي سيلاولرده تينچسيزليك، رويخط دن اوتكزيش مركزلري نينگ اوزاقليگي و عياللرنينگ سيلاولر اهميتي باره سيده خبر سيز ليگي، بيرقطار عياللرنينگ سيلاولرده اوز حقوقيدن فايده لنه آلمسليكلريگه سبب بولدي. ايتيليشيچه، ايريم حالتلرده، عياللر اورنيده ايرككلر اولرنينگ طرفيدن آواز استعمال قيلگنلر. عين حالده، سيلاولر مستقل كميسيوني نينگ دارالانشاه اداره سي رييسي امرخيل، لايحه اوز وقتي ده اولرگه ييتيب كيلگني ني ايتيب، سيلاولر مستقل كميسيوني هم بوندن آلدين بوليب اوتگن سيلاولر تجربه لريدن فايده لنيب، عياللرنينگ سيلاولرده كوپراق اشتراك ايتيشلري خصوصيده قوله يليكلرني يره تيش گه سعي و حركت قيلگن:" ايلك بار ديركه رويخط دن اوتكزيش مركزلرساني ني ناتينچ آلتميش تومندن بولك منطقه لرده آشيرديك. بيز ايلك بار سوادلي عياللرني تومنلرده بير محرمي بيلن مثال اوچون ايناغه سي، ايري يا تاغه سي بيلن وظيفه دارقيلديك، اولر شو طريق بيلن تشويش قيلمسدن سفر قيليب، سيلاولر گه تيگيشلي ايشلريني بجريشلري لازم. بيز عياللر سيلاولرده قتنه شيشي اوچون باشقه قوله يليكلرني يره تيشگه هم حركت قيله ميز". عياللر وزيرليگي، عياللرگه سيلاولر اهميتي باره سيده كوپراق معلومات بيريش اوچون بيرقطار تلويزيون وراديو لر بيلن ريكلم قيليش گه شرطنامه امضاله گني ني ايتيب، افغانستان تورلي منطقه لريده عياللر اوچون سينمار و ترغيبات ايشلري ني اوتكزيشي ممكنليگي باره سيده تاكيدله دي.

بیز بیلن علاقه قورینگ