بدخشانده يوزلب آدم اوبا كبي كسلليككه چلينگن

افغانستان شمالشرقي حدوديده جايلشگن بدخشان ولايتي دن ييتيب كيلگن خبرلرگه قره گنده، اوبا كسلليگي بير تور كسليك عاقبيتيده بير كيشي حياتي ني يوقاتيب، باشقه اونلب آدم نينگ احوالي آغيرايكني ايتيلگن.

بي بي سي نينگ بدخشانده گي مخبري قرانعلي همزي نينگ خبرقيليشيچه، فيض آباد شمالغربي ده جايلشگن دره ايم تومنيده 850 كيشي بو كسليككه چلينگن.

بدخشان حاكمي عبدالمعروف راسخ نينگ بي بي سيگه معلوم قيليشيچه، مذكور كسلليككه چلينيب، احوالي آغير بولگنلردن 35 ته سي فيض آباد شفاخانه سيگه ييتكزيلگن.

راسخ جنابلريگه كوره، بو تشويشلنرلي، او ايسه بيرنيچه ساغليق خذمت لربيلن مذكور تومنگه سفر قيلگن.

بي بي سي نينگ محلده گي مخبري، مذكور كسلليك نينگ اوبا بولگن بولمه گني انيق ايمس دييدي، او، كسللرده ايچكيتمه و قوسيش حاللري كوزه تيله ياتگني ني ايتگن.

مسووللر، بو كسليك ني انيقلش اوچون ايش باشله گنلر.

سوو آرقه لي چلينه ديگن اوبا كسلليگ نينگ مكروبي "ويبريوكلر" باكتيري دير. او تيزليك بيلن بدنگه ترقه له دي.

بو كسلليك نينگ كشنديليگگه قره مه ي، آسانليك بيلن دوالنه دي.