ایچکی ایشلر وزیرلیگی: حصارک تومنیده ییریک حربی عملیات باشلندی

افغان حکومتی گه کوره، ننگرهار ولایتی نینگ حصارک تومنیده طالبان عصیانچیلریگه قرشی ییریک حربی عملیات باشلنگن، شونینگ دیک رسمیلر حاضرگه قدر افغان امنیتی کوچلری قتیق مقاومت گه دوچ کیلمه گنینی ایتماقده لر.

افغانستان حکومتی بوندن بیرقنچه مدت آلدین لوگر ولایتی نینگ ازره تومنی و ننگرهار ولایتی نینگ حصارک تومنیده طالبان عصیانچیلرینی یوق ایتیش اوچون" سیمرغ" ناملی عملیات باشله نیشیدن خبربیرگن ایدی.

افغانستان ایچکی ایشلر وزیرلیگی گه کوره، ازره تومنیده عملیاتلر نیچه کون آلدین نهایه تاپیب مذکور تومن بوتونلی دولت تصرف گه اوتگن. ننگرهار ولایت نینگ حصارک تومنیده عملیات اوتگن کون باشلنگن.

افغانستان ایچکی ایشلر وزیرلیگی سوزچیسی صدیق صدیقی بوگون کابلده اوتکزگن مطبوعات انجمنیده، حصارک تومنیده گی عصیانچیلر هیچ قندی قتیق جنگ گه کیرمی دیورند چیزیغی نینگ اوتمانیده قاچیب کیتگنینی ایتدی:" اوزیز بیله سیز، افغانستان ایچکی ایشلر وزیرلیگی نینگ وقتینچه لیک وزیری مجتبی پتنگ ننگرهار ولایتی گه باریب وضعیت نی یقیندن تیکشیردی، بیز اوتگن کون حصارک تومنیده ییریک حربی عملیاتنی باشله دیک، عملیات باره سیده آلدین دن هیچ نرسه ایته آلمی من، اما عملیات باشلگندن بیری حاضرگه چه افغان امنیتی کوچلری قندی دیر جدی معما بیلن یوزمه یوز بولمه گن."

شونینگ دیک صدیقی جنابلری، ازره تومن اهالیسی گه یاردم لر بوله یاتگنینی اورغولب مذکور تومنده ملی اردو و پلیس کوچلری جایلشگنینی تیلگه آلدی. همده محلی پلیس کوچلری تشکیلاتی باره سیده هم فکر بوله یاتگنینی تاکیدله دی.

عینی حالده صدیقی جنابلری ازره تومنیده دوام تارتگن نیچه کونلیک عملیات لر نتیجه سیده قریب ایکی یوز عصیانچی هلاک بولگنینی معلوم قیلدی اونگه کوره، هلاک بولگنلر اره سیده چیت ایللیک عصیانچیلرهم موجود.

افغانستان ایچکی ایشلر وزیرلیگی مذکور عملیات ده فقط بیر پلیس هلاک وباشقه بیرنیچه پلیس یره لنگنینی ایته دی.