هرات ترانسپورت اداره سي درآمد ميزاني كمه يگنیگه اساسی عامل نیمه؟

يوزلب يوك تشووچي موتر هرات اسلام قلعه ترانسپورت قتناو يوليده جايلشگن ترمينلده توخته تيب قوييلگن. اولر يوك ته شيش نوبتلريني كوتماقده لر.

موتر هيداوچيلري نينگ ايتيشيچه، اولر گه بير ـ بير يريم آيده يوك ته شيشگه وقت بيريله دي. مذكور موترلر ايگه لري ايريم دليللر باعث، قتناو فعاليتلري سسته يگني دن شكايت ايتماقده لر.

هيداوچيلرنينگ معلوم قيليشيچه، ايران گه قرشي اقتصادي باسيملر، اولرنينگ ايش فعاليتلريگه هم تاثير اوتكزگن. اولرشونينگ ديك، 2014 ييلده خارجي قشونلر افغانستان ني ترك ايتيشي، سوداگرلرنينگ تشويشيگه سبب بوليب، ايريم سرمايه گذارلر اوز سرمايه لريني مملكت دن آليب چيقيشگه حركت قيله ياتگني باره سيده گپيرماقده لر.

هرات ده خوفسيزليك وضعيت يامانلنه ياتگني، هيداوچيلر و سودا تدبيركارلري نينگ فعالتيگه سلبي تاثير اوتكزيب، عصيانچيلر تمانيدن ناتو نينگ تامينات كروانلري و اولرگه يوك ييتكزووچي موترلرنينگ اوتگه يانديريله ياتگني، ينه هم خواطرلرني آشيرگن.

بوندن بير نيچه وقت آلدين هرات ـ قندهار ترانسپورت قتناو يوليده طالبان نينگ هجومي نتيجه سيده يانيلغي ته شووچي تانكرلري اوتگه يانديريلگن حاجي غلام فاروق، موجود وضعيت دن ناراض. او، جاري وضعيت هيچ بير تدبيركار فعاليتي اوچون قوله ي ايمس دييدي.

تدبيركارگه كوره، قتناو يول آقيميده عصيانچيلر يولدن اوته ياتگن موترلرني توخته تيب، گروهي شكلده اوتگه يانديرگنيگه گواه بولگن. اونينگ ايتيشيچه، ناتو كرواني ني نظارت ايتووچي قوراللي قوريقچيلر، عصيان لرنينگ هجوميني باستيره آلمه ي، محل دن قاچيب كيته ديلر.

معلوماتلرگه كوره، جاري ييل باشيدن بيري هرات ـ قندهار ترانسپورت قتناو يوليده اونلب يوك ته شووچي موتر اوتگه يانديريليب، اولرنينگ هيداوچيلري هم قربان بولگنلر.

مملكت غربي ده گي يوك ته شووچي خصوصي ترانسپورت باشليغي حاجي عبدالله صديقي، اوتميشده اسلام قلعه و تورغندي بندرلريدن هفته ييگه كميده تورت يوز موتر قتنب توريشردي، اما رمضان دن بيري فقطگينه يوزگه يقين موترگه يوك آرتيلگن خلاص دييدي.

او، شونينگ ديك، رمضان آييده دولت تمانيدن يوزلب خوفسيزليك پوسته اورنه تيلگن هرات ـ قندهار قتناو يولي آقيميده عصيانچيلر 88 ته يانيلغي ته شووچي تانكرني اوتگه يانديرگني ني معلوم قيلدي.

هرات ترانسپورت اداره سي اوتگن ييل كميده 470 ميليون افغاني درآمد قولگه كيريتگن، اما جاري ييل اولگي اوچ آيي ايچيده اوتگن ييلگه قره گنده، بو اداره نينگ درآمد ميزاني 17 فايزگه كمه يگن.

اداره رييسي احمد جاويد ايماق، قتناو يوللرتينچسيزليگي، نيمروز نينگ تجارت بندري فعاليتگه باشله گني و ايران گه قرشي باسيملر كوچه تيريلگني ني ترانسپورت فعاليتلريگه تاثير سالمه گن، اما 2014 ييل بهري بير هر تماندن اوز تاثيريني اوتكزماقده دييدي.

هرات ده اكثريت ترانسپورت شركتلر و موتر هيداوچيلري، موجود وضعيت دن ناراض. اولر فعاليتلري قيته رواجلنمه گن تقديرده، ايشسيزليك ميزاني تاباره آشيشي ممنكليگي ني ايتماقده لر.

اولرنينگ شونينگ ديك، دولت بو توغريده چاره تدبير كوريب چيقمه گن تقديرده، هيداوچيلركينگ نمايشلرگه قول اوريشلري ممكنليگي باره سيده آگاه لنتيريشماقده لر.

افغانستان حكومتي هر دايم تاجر و سرمايه ياتقيزووچيلرني قوللب قوتله شيني وعده بيريب كيلماقده، اما تشبثكارلر، دولت حاضر گه قدر بيرگن وعده لريني عملگه آشيرمه گن دييشه يپتي.