شمالي ولايتلرده ياشلرنينگ فوتبالگه قيزيقشلري آشيب بارماقده

سه شنبه كوني كابلده افغانستان و پاكستان اورته سيده 30 ييلدن سونگ، فوتبال مسابقه سي يولگه قويله دي. مسابقه ده ايكله تمان فوتبال تيملري تيارگرليك كوريشماقده لر.

فوتبال بوگونگي كونده افغان ياشلري اينيقسه اوزبيكلر آره سيده قيزيق بير اويينگه ايلنگن. شمالي ولايتلر ده ياشلر بو اويينگه كينگ اشتراك ايتيب، آدملرنينگ دقتيني جلب ايتيشماقده لر.

بوندن تشقري دنيا مقياسيده زبردست فوتباليستلرنينگ اويين مسابقه لري، افغان ياشلري نينگ تاباره بو اويينگه قيزيقيشلريني آشيرگن. مملكت ياشلر خارجي تيملرده گي اويينچيلرنينگ مسابقه لريني دقت بيلن تماشه قيليشه دي.

ليكن، افغان ياشلريگه فوتبال وباشقه سپورت خذمتلري مهيا بولمه گني، اولرنينگ هردايم شكايتيگه هم سبب بولگن. تخارده ياشلر اوچون دولت تمانيدن فوتبال ميدانلري ايجاد ايتيلمه گن بولسه هم، ياشلر اوزلري عليحده جايلرده اويين قيليشه ديلر. تخارليك فوتبالچيلردن بيري نينگ ايتيشيچه، موجود معما لرگه قره مه ي، ياشلر دوچ كيلگن ميدانلرده مسابقه و اويينلريگه دوام ايتماقده.

شونگه قره مسدن طلبه لر اوچون ايجاد ايتيلگن بعضي بير انجمنلر، ياشلرني سپورت گه قيزيقتيريش اوچون اوز مركزلريده فوتبال تيملريني تاسيس ايتيب، انجمن فوتبال تيملري ارا مسابقه لرني هم يولگه قوييشماقده لر.

بو سپورت مملكت نينگ هر بير حدوديده رواجلنيب كيلماقده، اما ميمينه شهريده فوتبالچي ياشلردن بيرقطاري فوتبال اويينش اوچون مناسب ميدانلر يوقليگي اولر اوچون اساسي معما گه ايلنگن.

فوتبال ياشلر اوچون اينگ قيزيق اويينگه ايله نرايكن، بو اويين اقتصادي مسله لر سبب برچه گه مهيا ايمس. قطار ياشلر روزغار ني نان بيلن تامينلشگه مسوول، اولر حتي شو مسله باعث فوتبال ني ترك ايتيشگه هم مجبور بوليشه دي. شونده ي معمالر گه قره مه ي، افغانستان ده اوتگن اون ييل ايچيده سپورت ساحه لريده كته رواجلنيش يوزبيرگن. جمله دن فوتبال.

افغانستانده فوتبال و باشقه سپورتلر سراجيه دوريده وجود گه كيلدي، ايلك بار مكتبلرده خارجي مربعلر تمانيدن تدريس قيلينه باشله دي. كيينچه ليك 1923 و 1924 ييللريده قطار تيملر تشكيل ايتيلدي. جمله دن مهاجر تيمي، استقلال تيمي، حبييه تيمي و تفريح تيمي ايجاد ايتيليب، بو تيملر اورته سيده مسابقه لر يولگه قويلدي. اوشبو مسابقه لرده دولت يوقاري مرتبه لي اعضالري اشتراك ايترديلر.

اما 1933 ييلده افغانستان ده ايلك بار فوتبال ملي تيم تشكيل ايتيلدي. كيينچه ليك فوتبال فدراسيوني هم تاسيس ايتيليب، 1984 ييلده فيفا نينگ اعضاليگيني قولگه كيريتدي. بيرينچي مسابقه 1942 ييلده ايران ملي تيمي بيلن مسابقه اوتكزيب، صفر نتيجه سي بيلن يكونلندي. افغانستان نينگ ملي تيمي لندن المپيك اويينلريده هم قتنه شيب، لوگزامبورگ بيلن رقابت قيلدي.

آره دن كوپ ييل اوتيب افغانستانده فوتبال قيته دن جان آلدي، بوگون گي كونده مملكت نينگ هر بيرحدوديده ياشلر فوتبال گه قيزيق، ولايت لر ارا مسابقه لر يولگه قوييليب كيلماقده.