هندوسیکلر اوچون کرسی اجره تیش لایحه سی تصدیق لندی

افغانستان كابينه سي،اولوسي جرگه ده هندو وسيكلراوچون كرسي اجره تيشي لايحه سيني تصديقله دي.ينگي ايشلب چيقيلگن لايحه گه كوره، اولوسي جرگه ده گي كرسيلرساني 249 دن 250 گه آشيريله دي.

افغانستان وزيرلر كينگشي اولوسي جرگه ده آزچيليك هندو وسيكلر نماينده لري اوچون بير كرسي قوشيمچه قيليش لايحه سيني تصديقله گن.

وزيرلركينگشي مطبوعات اداره سي نينگ بيرگن معلوماتيگه كوره، مذكورلايحه اوتگن كون بيرينچي اورين باسر محمد قسيم فهيم باشچيليگي ده اوتكزيلگن ييغينده تصديقلنگن.

وزيرلر كينگشي شونينگ ديك، مذكور قانون نينگ اونينچي ماده سيگه بير بند قوشيمچه قيليب، اونينگ اساسيده هندولر و سيكلر سيلاولر نينگ بير حوزه سي صفتيده نظرگه آلينه دي.

مطبوعات اداره سي، وزيرلركينگشي نينگ تصديقي دن اوتگن لايحه نهايي تصديقلنيش اوچون پارلمانگه هم يوباريليشي حقيده ايضاح بيرمه گن.

پارلمان نماينده لري حاضرگي كونده ياز تعطيلاتيگه چيققنلر.

بوندن 45 كون آلدين افغانستان پارلماني هندو وسيكلر گه كرسي بيريليشي موجلجللنگن لايحه ني رد ايتدي، شونينگ آرتيدن هندو وسيكلر نينگ مركزي كينگشي اعتراض بيلديردي و بو اعتراض قطار اداره لرنينگ حمايه سيگه هم سبب بولدي.

افغانستان هندو و سيكلري، حاضرگي كونده اولرنينگ ساني كميده 3500 دن تورت مينگگه قدر ايكني ني ايتيشماقده.

اولرنينگ اعتراضلري آرتيدن، افغانستان جمهور رييسي حامدكرزي اولربيلن اوچره شيب، اولرنينگ سياسي حقوقي تامينلنيشي توغريسيده سعي و حركت قيليشيني وعده قيلدي.

مذكور اوچره شووده قتنشگن هندولر و سيكلر نينگ مركزي كينگش معاوني راويل سينگ نينگ بي بي سيگه ايتيشيچه، آزچيليك نماينده لري جمهور رييسگه اوز تكليف وايستكلريني آچيق روشده اظهار ايتگن.

اونگه كوره، اوچره شووده، فعاللر كيمليكلريني هم جمهور رييسگه كورستيب، اولوسي جرگه ده اولر اوچون كرسي اجره تيمله گن تقديرده، افغانستان فقراليگي دن واز كيچيشلري ممكنليگي باره سيده آگاه لنتيرگنلر.