"افغان عياللر گه قرشي زوره وانليك ني منع ايتووچي قانون تصديقلنسين"

Image caption تشكيلات تمانيدن نشر ايتيلگن گزارش نينگ بير پرچه سي جمهور رييس كرزي گه هم تقديم ايتيلگن.

انسان حقلريني حمايه ايتووچي خلق ارا تشكيلات، زوردن تورموشگه چيقه ريش و عايله وي زوره وانليكلرني افغانستانده اينگ كته معما ايكني ني قيد ايتدي.

انسان حقلري تشكيلاتي افغانستان جمهور رييسي حامدكرزي دن عياللر كه قرشي زوره وانليك ني منع ايتووچي قانون تصديقلنيشي و عملده جاري قيلينيشي ني سوره دي.

انسان حقلريني سقلاوچي خلق ارا تشكيلات، جمهور رييسليك سيلاولر يقينلنيشي بيلن اون بير ييل دواميده افغانسان ني باشقريب كيلگن حامدكرزي عياللر گه قرشي زوره وانليك ني منع ايتووچي قانون ني تيزآره سيده تصديقدن اوتكزيشي كيره لازمليگي ني تاكيدله دي.

افغانستان خلق وكيللر مجلسي جاري باشيده عياللر گه قرشي زوره وانليك لرني منع ايتووچي قانون ني بيرقطار وكيللر اسلام شريعيتيگه ضد ديب، تصديقلشدن باش تارتيديلر.

شونگه قره مسدن حامدكرزي نينگ عياللر گه قرشي زوره وانليك منع ايتيليشي باره سيده گي فرماني حاضرگه قدر جاري ايتيلماقده.

اولوسي جرگه اعضالري قانونده قيد ايتيلگن تورموشگه چيقيش ياشي، آته آنه صلاحيتسيزليگي، بير خاتين دن زياد گه اويلنمس ليك، عياللر اوچون تينچ خانه لر تيارلنگني، جنسي زورلش وكلتكلش حاللريگه قرشيليك بيلديرگن ايدي.

انسان حقلريني حمايه لاوچي تشكيلات حامدكرزي د افغانستان بويلب قرشيليككه رو په ره بولگن قانون، تيزليك دن تصديقدن اوتيشي ني سوره ب، عياللرگه قرشي زوره وانليكلر ني توسه ديگن قانون ني تصديقلب جاري قيليشيني طلب قيلگن.

تشكيلات تمانيدن نشر ايتيلگن گزارش نينگ بير پرچه سي جمهور رييس كرزي گه هم تقديم ايتيلگن. مذكور پرچه ده حامدكرزيدن قانون تصديقلنيشي اوچون گزارش ني دولت برچه اداره لري و نفوذلي شخصلرگه ترقه تيشي طلب قيلينگن.

انسان حقلريني حمايه ايتووچي اوشبو تشكيلات افغانستان ده عياللر اوچون تينچ خانه ايجاد ايتيلگني ني خوش قرشيلب، ايچكي ايشلروزيرليگي همده باش قاره لاوچيليكده عايله لرني حمايه لش اوچون اداره لر تشكيل ايتيلگني، افغانستان دولتي نينگ اينگ ارزشلي فعاليتلريدن ايكني ني بيلديردي.

Image caption 18 گه ييتمه گن قيزلرني تورموشگه چيقه ريش، جسماني و روحي آغير ضررلرگه سبب بوليشي ممكن.

عيال عسكرلر ساني آشيب باره ياتگني، قيز و اوغيللر اوچون اويله نيش ياشي 18 تعيينلنگن قانون نينگ تصديقدن اوتيشي،زوردن تورموشگه چيقه ريش حقيده پيدا بوله ديگن جنجل و معمالر باره سيده معلومات ترقه تيش، زوره وانليكلرميزاني ني كمه يتيريش و تينچ خانه لرني حمايه لش، انسان حقلريني حمايه ايتووچي تشكيلات نينگ افغانستان جمهور رييسي دن سوره گن باشقه طلبلريدن بيري دير.

بو تشكيلات افغانستان دولتي دن ايرته تورموش گه چيقه ريش جرياني ني توخته تيش و اونگه پايان بيريش عايله وي زوره وانليكلرني يوق ايتيشده لازم حركت قيليشي ني سوره گن.

كابل ده چهار شنبه كوني نشر ايتيلگن بو تشكيلات نينگ گزارشيده، اوتكزيلگن تدقيقات ده مذكور ايكي حادثه ساغلام و اقتصادي ضررلرني كيلتيريب چيقه ريشي ممكنليگي آگاه لنتيريلگن.

انسان حقلري ني حمايه ايتووچي تشكيلات نينگ تاكيدلشيچه، ياشي 18 گه ييتمه گن قيزلرني تورموشگه چيقه ريش، جسماني و روحي آغير ضررلرگه سبب بوليشي ممكن.

اوشبو گزارش گه كوره، بونده ي عياللرفرزند كورگن حالده، هم جسماني و روحي نقطه ي نظردن تاثيرلنيب، همده اولرنينگ اوليميگه سبب بوله دي.

افغانستان ده بوگونگي كونده اورته چه اويله نيش خرجتي آلتي مينگ امريكا دالريگه تينگ.

اوشبو گزارشده بيرقطار اسلامي ممكلت اينيقسه مسلمانلر ساني كوپ بولگن مملكت لر گه دقت قره تيب، او مملكتلر قانوني ياشيني تولديرمه گن قيزلر نينگ تورموشگه چيقه ريش ني آلديني آليش اوچون ايشلب چيقيلگن قانون ني تصديقله گني تاكيدلنگن.

مذكور گزارشده هندوستان، بنگله ديش ، مصر،عراق، ليبيا، تانزانيا، مراكش، اردون، عمان و باشقه بيرقطار اسلامي ممكلتلر قانوني ياشگه تورموشگه چيقه ريش اوچون قاعده قانونلر ايشلب چيققني ايتيلگن.

عياللرگه قرشي زوره وانليكلرني منع ايتووچي قانون لايحه سي 1388 ييل سرطان آيي نينگ 29 ده جمهور رييس نينگ تقنيني فرماني اساسيده 4 فصل و 24 ماده ده تيارلنيب، تصديقلندي.

*بو حقده فکرینگیز بولسه قوییده کی فورم آرقه لی بیزگه یوبارشینگیز ممکن.