فاينال: افغانستان – هندستان

قوشني افغانستان ملي تيرمه جماعه سي جنوبي آسيا فوتبال اويوشمه سي نينگ آلتين جام اوچون كوره ش ني باشله دي.

ملي تيرمه جماعه نيپال ده كيچه ياتگن منطقه وي تورنمينت نينگ فاينال بيلله شويده هندوستانگه قرشي ميدانگه توشگن.

بو- آلتين جام اوچون كوره شه ياتگن ايككي رقيب جماعه نينگ فاينال باسقيچيده ايككينچي باربير- بيرلريگه قرشي توپ سوره شلري بوله دي.

اما 2011 ييلده بوليب اوتگن فاينال بيلله شووي هندستان حسابيگه حل بولگن وافغانستان ايككينچي اورين بيلن كفايه لنيشيگه مجبور بولگندي.

عين اورينده شوني هم تاكيدلب اوتيش جايزكه، شونده هم، بو- هندستان ملي تيرمه جماعه سي اوزتاريخيده قيد ايتگن اينگ يوكسك نيتجه بوله دي.

افغانستان بو ييلگي تورنمينتي نينگ گروهي باسقيچ سره لش بيلله شوولريني كيتمه – كيت غلبه بيلن باشلنگن، بوتان وسريلانكا ني ييريك حسابده مغلوب ايتگن ايدي.

ايككي غلبه سي آرتيدن، مدتيدن ايلگري يريم فاينال باسقيچيگه چيققن، اما ملديو گه قرشي گروه باسقيچ سره لش اوچره شوولري نينگ سونگي سيده دو رنگ نتيجه قيد ايتگندي.

شوندن سونگ، اياوسيز و تعبيرجايز بولسه، درامه تيك كيچگن يريم فاينال اوچره شووده، ميزبان نيپال نينگ كيچيك حسابده گي فرق بيلن اينگيب، فاينال باسقيچيگه چيققندي.

افغانستان ملي تيرمه جماعه سي بيلن تقاسلنگنده، عملده گي آلتين جام صاحبي ايكنيگه قره مه ي، هندستان گروه باسقيچ سره لش بيلله شوولريده انچه كمتر نتيجه قيد ايتگن.

آلتين كره آلتين جام صاحبي بولگن هندستان بو ييل هم تورنمينت فاروردلريدن بيري صفتيده كوريلگندي.

اما ملي تيرمه جماعه بوگل پاكستان ني اينگيب، بنگله ديش ني عمللب چيققن.

يريم فاينال بيلله شوويده مالديو ني مغلوب ايتيب، كيتمه – كيت ايككينچي بارجنوبي آسيا فوتبال اويوشمه سي آلتين جامي نينگ فايناليده توپ سوره ش حقوقيني قولگه كيريتگندي.

نيپال ده گي تورنمينت 31 اگيست كوني ستارت آلگن و بوگونگي فاينال اوچره شووي بيلن نهايه سيگه ييته دي.

اوشبو منطقه وي تورنمينتده عنعنوي روشده سكيز دولت – افغانستان، پاكستان، هندستان، بنگله ديش، سريلانكا، مالديو، نيپال و بوتان اشتراك ايتيب كيليشه دي.

اما افغانستان جاري پيتده بو سكيز اشتراكچي دولت آره سيدن 139- اورين بيلن فيفا جدوليده اينگ يخشي نتيجه ني قيد ايتيب توريبدي.

اوني اوتكزيشدن مقصدايسه، جنوبي آسيا منطقه سيده فوتبال ني ينه ده رواجلنتيريش ايكني ايتيله دي.

افغانستان ملي تيرمه جماعه سي اوشبو منطقه وي تونمينتده 2005 ييلدن باشلب اشتراك ايتيب كيله دي.

بوگونگي رقيبي هندستان اشتراكي ايسه، جنوبي آسيا فوتبال اويوشمه سي آلتين جامي ستارت آلگن 1993 ييلگه باريب تقله دي.