اولوسي جرگه بدخشان وضعيتي دن خواطرده

بدخشان ولايتي ده گي نابرقرارليكلر همده بو ولايت نينگ وردوج تومني ده افغان خوفسيزليك كوچلري هلاك بولگني، اولوسي جرگه نينگ بوگونگي ييغينده كته بحثگه ايلندي . بدخشان ولايتي اهالي سي نينگ اولوسي جرگه ده گي بيرقطار نماينده لري بونگه قرشي ليك بيلديريب، پارلمان ني ترك ايتيب، حكومت و پارلمان ني مسله گه اعبتار قره تمه گنليكده عيبلشدي.

شونينگ ديك، بدخشان ملت وكيللري نينگ ايتيشچه، حكومت ايچيده فعاليت قيله ياتگان بعضي گروه لر بدخشان ولايتي ني ناتيچ ليككه ايلنتيريشيگه حصه قوشيشيب، جنگري گروه گه هم ياردم ييتكزيب بيريشه دي.

بو ملت وكيللري، بدخشان ولايتي وضعيتي ني يقيندن اورگه نيش وكوريب چيقيشي اوچون پارلمان تمانيدن محلگه بيرهيأت ني يوباريب توليق معلومات لرني آليب پارلمان گه ايضاح بيريشيني طلب قيليشدي.

نهايتده اولوسي جرگه نينگ اداري بوليمي بيرگروه هيأت ني محلگه يوباريشي باره سيده قرار قبول قيليب، مذكور هيأت اعضالري نينگ اسملريني اعلان قيليشدي.

مملكت شمالشرقي حدوديده جايلشگن بدخشان ولايتي، جغرافيايوي نقطهء نظردن تاغلي بير ولايت. شومسله باعث، جنگريلر اوچون اينگ اساسي فعاليت محليگه ايلنگن. اولر تيپه زار و سايلردن اوزلريني مدافعه قيليش و دولت كوچلريگه قرشي هجوم اويوشتيريشگه فايده لنيشه دي.

باشقه تماندن بدخشان ولايتي پامير وهندوكش تاغلريده پاكستان قبيله لر منطقه لري يعني چترال بيلن اوزاق چيگره مسافه ني تشكيل ايته دي. بو ايسه، قوراللي طالبان پاكستان اولكه سي نينگ عيناً خودي چترال منطقه سيدن بدخشان ولايتيگه كيليشيب فعاليت قيليشيگه زمينه يره تگن. بدخشان ولايتي نابرقرار منطقه لريني طالبان نظارتيدن تازه لش مقصديده بير نيچه بار حربي عمليات لر يولگه قويلگن ايدي، رسميلر، بو عملياتلر ده منطقه لر قوراللي طالبان تصرفيدن تازه لنگني ني معلوم قيلينگني ني ادعا قيليشگندي.

اما اولوسي جرگه نينگ بوگونگي ييغينيده بو ولايت نينگ وردوج تومنيده سونگي كونلر قريب 250 كيشي ملي اردو و پليس عسكري هلاك ايتيلگني جدي تنقيد لرگه سبب بوليب، خوفسيزليك مسؤول لرني عيبدار دييشدي. ملت وكيللري، بدخشان ولايتيده عملگه آشيريلگن حربي عملياتلر خوفسيزليك كوچلري نينگ موافقليگي بيلن اوتكزيلمه گني ني ادعا قيليشماقده. اولرگه كوره، بو مسله خوفسييزليك كوچلري تلفات ميزاني ني آشيريشگه سبب بولگن.