اوروپا فوتبال فدراسيوني رييسي ميشل پلاتيني كابلگه ييتيب كيلدي

اروپا فوتبال فدراسيوني يا يوفا اداره سي رييسي ميشل پلاتيني كابلگه تشريف بويوردي. اورپا فوتبال فدراسيوني افغانستان فوتبال چيلريني حمايه قيليشيني اعلان قيلدي.

او كابلگه كيلگنيدن كيين، فوتبال ميدانيگه باريب، افغانستان فوتبال ملي تيمي، ياشلر همده قيزلر تيمي بيلن ديدارلشدي.

افغانستان فوتبال ملي تيمي جنوبي آسيا مسابقه لريده قهرمانليك عنواني ني كسب ايتگن دن كيين، بو اورپا فدراسيوني نينگ ايلك رسمي سيديركه افغانستان گه سفرقيلگن.

افغانستان فوتبال فدراسيوني مسووللري ومربعلر اوروپا فوتبال يوقاري مرتبه لي رسمي سي ميشل پلاتيني ني كابل هوا ميدانيده كوتيب آليشدي.

ميشل پلاتيني هوا ميدانيده توپ ني شوت قيليب، افغان فوتباليني حمايه قيليشي ني اعلان قيلدي.

او افغانستان فوتبال رسيملري بيلن بير قوشمه مطبوعات ييغينده قتنه شيب، افغانستان گه كيلگنيمدن فخرلنه من ديدي.

پلاتيني جنابلري، افغانستان فوتبال تيمي نينگ جنوبي آسيا مسابقه لريده قهرمانليك عنواني ني كسب ايتگنيگه اشاره قيليب، بو ينه ده موفقيت گه ايريشيشي باره سيده اميد بيلديردي.

ميشل پلاتيني، شونينگ ديك، افغانستان فوتبال تيمي نينگ سونگي يوتوقلريني تبريكب، بو مملكت فوتبال تيمي ني هر تمانلمه حمايه قيليشي ني اعلان قيلدي: "مين افغانستان گه بير فوتبال اويينچي سي صفتيده ايمس، بلكه اوروپا فوتبال بيرليگي و فوتبال خلق ارا فدراسيوني تمانيدن كيلگن من. كيلگنيمدن مقصد افغانستان نينگ ينگي اياققه تورگن فوتبال تيمي ني حمايه قيليشدن عبارت. اروپار بيرليگي افغانستان فوتباليگه هيچ قنده ي ياردم كيره ك بولسه ياردم قيليب، مربع لرني تيارگرليك دن اوتكزيش همده ياشلر و قيزلرنينگ ملكه سيني آشيريشده گه تيار."

او، افغانستان فوتبالي نينگ كيله جگي حقيده بشارت بيره آله سيزمي ديگن سوالگه، بيز افغانستان فوتبالي ني حمايه قيله ميز، كيين گي برنامه لر افغان فوتبال فدراسيوني و اويينچيلري نينگ ملكه سيگه تيگيشلي ديب جواب قيتردي.

افغانستان فوتبال فدراسيوني برابريده تورگن معمالر دن بيري تجربه لي مربع لر يوقليگي دير. پلاتيني كيله جكده برنامه لرده اوروپاليك مربع لر افغانستان گه كيليب، افغان مربع لرني تعليم بيريب ويا اولرني اروپا گه يوباريش ريجه لرعملگه آشيريليشي باره سيده تاكيدله دي.

بو مطبوعات ييغينيده، افغانستان فوتبال فدراسيوني رييسي كرام الدين كرام هم سوزگه چيقيب، افغانستان فوتبال تيمي سونگي ييللرده مثلي كورينمه گن درجه ده رواجلنگني ني تيلگه آلدي.

او افغانستان نينگ تورلي ولايتلرده بير نيچه فوتبال ميدانلري ايجاد ايتيليشي نظرده توتيلگني دن خبر بيردي: "يقين آره ده ولايتلرده هم فوتبال ميدانلريني ايجاد ايته ميز. پلاتيني جنابلري نينگ افغانستان گه تشريف بويورگني، افغانستان فوتبالي و همه اوچون كته اهميتلي حادثه".

ميشل شونينگ ديك، افغانستان جمهور رييسي حامدكرزي بيلن هم عليحده اوچره شه دي.

پلاتيني دنيا فوتبالي نينگ مشهور اويينچيلريدن بيري بوليب، 356 بار گل اوريشگه موفق بولگن. او زين الدين زيدان، ديه گو مار ادونا، پله، يوهان كرايفو آلفرد وباشقه فوتبال اويينچيلري قطاريده اورين آلگن.