محقق جمهور رئیس لیک معاون لیگی اوچون استعفاگه چیقدی

Image caption محقق جنابلري حامدكرزي حكومتي نينگ سياسي مخالفلريدن تشكيل تاپگن "سيلاولر اتفاقي" ايتلافي نينگ يوقاري اعضالريدن سنه له دي.

جمهور رييسليك سيلاو نامزدلري ني رويخطدن اوتكزيش اوچون بيلگيلنگن وقت يكونيگه يقينلشيشي بيلن، ايتلاف و سياسي حزب لر سيلاولرنامزدلريني اعلان قيليشه دي.

عين مناسبت بيلن سيلاولر اتفاقي نينگ يوقاري مرتبه لي اعضاسي اولوسي جرگه وكيلي محمد محقق مجلسي اعضاليگي دن استعفا بيرگن.

اولوسي جرگه اعضاسي و افغانستان جهادي رهبرلريدن محمد محقق، جمهور رييسليك سيلاولريده اشتراك اوچون اولوسي جرگه اعضاليدن استعفا بيرگنيني معلوم قيلدي.

محقق جنابلري نينگ بوگون بي بي سيگه ايتيشيچه، او اوتگن كون اوز استعفا خطي ني اولوسي جرگه گه تاپشيرگن.

:"سيلاولر قانونيده اوزيني نامزد قيله ديگن شخص اوزي نينگ آلدينگي وظيفه سيدن استعفا بيريشي قيد ايتيلگن، شونگه بنآ مين تيارگرليك كوريش اوچون اوتگن كون استعفا خطيم ني يازديم" دييدي محقق جنابلري.

اوتگن كون محمد محقق عبدالله عبدالله نينگ سيلاولر تيميده ايكينچي معاون صفتيده تعيينلگني حقيده خبر نشر ايتيلدي.

بو خبر ايسه تورلي عكس العمللرگه روپه ره بولدي، اما محقق جنابلري نينگ بي بي سي بيلن قيلگن صحبتيده، بو خبر ني تصديق و يا هم رد ايتمه دي، اما كيله سي هفته جريانيده اوز موقعيني رسمي روشده اعلان قيليشي معلوم قيلدي.

اما ملي ايتلاف سوزچيسي فاضل سنچاركي نينگ بي بي سي، ايتيلاف رهبري عبدالله عبدالله جمهور رييسليككه نامزد قيليشگه تيارگرليك كورگن دييدي:" داكتر عبدالله جنابلري هم ملي ايتلاف تمايندن تعيينلگن. بختگه موافق اسلامي جمعيت حزبي نينگ اينگ يوقاري شخصيتلري بوكيشي نينگ نامزدليگي حمايه ايتيشدي. شونگه قوشيمچه باشقه بير قطار سياسي حزب گروه لر هم حمايه ايتيشلريني اعلان قيلگن وايريم گروه لرهم بوحقده حمايه ايتيشلري ممكنليگي ني ايتيشگن. محقق جنابلري نينگ معاونليك موضوعي نهايي بولگن،اما بيرينچي معاون ني تنلش اوچون ايش آليب باريلماقده. شو مذاكره لرنينگ نتيجه لري انيق لنگن حالده، نامزدليك رويخطي ني امضالشگه باريشه دي".

عين حالده، اشرف غني احمدزي نينگ مطبوعات كاتبي لالپاچا آزمون، تيزآره ده اشرف غني احمدزي هم جمهور رييسليككه اوز نامزدليگيني ايلگري سوريشي ممكنليگي ني تاكيدله دي. غني جنابلري حاضر گي كونده خارجي كوچلردن خوفسيزليك مسوولتلرني افغان كوچلريگه تاپشيريش جرياني مسولي صفتيده وظيفه بجره دي. او هم اوتكن سيلاولرده جمهور رييسليك نامزدلريدن بيري ايدي، اما اونچه هم آواز قولگه كيريته آلمه دي.

اما كرزي جنابلريني حمايه ايتووچي و اونگه يقين شخصلر هنوزگچه سيلاولرده نامزدلريني اعلان و يا هم حمايه قيليشمه گن.

افغانستان سيلاولر مستقل كميسيوني سوزچيسي نورمحمد نور، حاضر گه قدر فقطگينه بير كيشي جمهور رييسليك و 461 نفر ولايت كينگش سيلاولريده اوزلريني نامزدليك رويخطي دن اوتكزگن و اولردن 52 ته سي عيال دييدي.