ننگرهارده باشی توتش ایگیزکلر جراح لیک عملیاتی بیلن اجره تیلدی

افغانستان شرقيده گي ننگرهار ولايتيده بير داكتر مثلي كوريلمه گن بير جراحي عملياتده بير ايكي آيليك باله نينگ باشيدن بير كته غده ني اجره تيب آليشگه موفق بولگن.

باله نينگ كله سي نينگ آرقه تمانيگه ياپيشگن بو كته غده، اونينگ عصبي نينگ بير قسمي گه باغلنگن بوليب، مذكور داكتر بو عمليات ني اوچ ساعت ايچيده بجريشگه موفق بولگن.

باله نينگ اسمي عصري گل بوليب، چپرهار تومنيده دنيا گه كيلگن.

اوزي نينگ تورت كيشي همكاري بيلن بوقيين جراحليك عمليات ني بجريب داكتر احمد عبيد مجددي بي بي سيگه بوني افغانستانده مثلي كوريلمه گن عمليات ديب توصيفله دي.

باله نينگ باشي آرقه تمانيده عينآ باشقه بير كله كبي تومپيق موجود بوليب، اونده مهم عبصي رشته لرجايلشگن ايدي دييدي او .

اونينگ ايتيشيچه، باله آنه سي ايچيده بولگن پيتده اونينگ باشي تمانيده ينه بير باله نينگ اوسگني احتمالي موجود، شو باله كيينچه ليك گودك نينگ باشيگه ياپيشيب قالگن:"باله نينگ ميه سي شونده ي كورينرديكه، گويا اينكه بو باله اوچينچي نفر بولسه، اما تيريسي عليحده، كوزي عليحده ايمس. باله نينگ ميه سي اونينگ آنه سي نينگ قارنيده اوچيني باله با ليگي انگلته تردي. تومپيق و باله نينگ دماغلري بير بيراويدن اون بيش سانتي متر مسافه جايلشگن ايدي. بو قوشيمچه كله اوزي نينگ كيره كلي قانيني باله نينگ باشيدن آلردي".

ننگرهار ساغليق ني سقلش داكترلري، شفاخانه لريده زمانوي طبيات اسباب اوسكونه لر موجود بولمه گني قره مه ي، بو نده ي عمليات ني بجرگنليكلريدن خرسند ليك اظهار ايتيشماقده.

شفاكارلرنينگ ايتيشيچه، بونده جراحليك عملياتلر باشقه دنيا 50 مينگ دالر خرجت كوته ره دي، اما اولر بو عمليات ني بي پول بجريشگنلر. اولرگه كوره، باله نينگ عايله سي كمبغل بوليب، عمليات گه پول توللشگه قادر ايمس.

باله نينگ ساغليق احوالي يخشي بوليب، بير هفته شفاخانه ده ياتقيزيليب، بوگون رخصت قيليندي.

داكتر احمد عبيد مجددي، ننگرهار طبيات فاكلته سيني اوقيب بيتيرگن او طبيات بوييچه متخصص. بوندن آلدين پاكستان نينگ لاهور شهريده عصب جراحليك بوييچه تحصيل قيلگن.

مجددي جنابلري، خارجدن افغانستانليك داكتر مملكتگه قيتگن حالده، افغانستان ده ساغليق معمالربرطرف ايتيشي ممكنليگي باره سيده اميد بيلديردي.

افغانستان ساغليق ني سقلش وزيرليگي، حاضر گي كونده كميده مملكت اهاليسيدن 70 فايزي ساغليق خذمتلري بيلن تامينلنگني ني ايتماقده، شونگه قره مه ي، هنوز هم بيرقطار افغانلر دوالنيش اوچون قوشني مملكتلرگه سفر قيليشه دي.