غزني ولايتيده روي بيرگن پارتلشده اوچ تينچ اهالي اولگن

افغانستان جنوبيده جايلشگن غزني ولايتي محل مسووللري، ده يك تومنيده يول چيككه سيگه اورنه تيلگن ماين پارتلشي عاقبتيده اوچ كيشي اولگن و بیر باله ایکی عیال داخل یتتی کیشی یره لنگن.

غزني حاكمي معاوني محمدعلي احمدي، پارتلش ايرته لب ساعت 6:45 دقيقه اطرافيده يوز بيرگني ني ايتگن.

ماين، ده يك تومني رباط قيشلاغيده يول چيككه سيگه اورنه تيلگن بوليب، غزني شهريگه تمان كيله ياتگن يولاوچي مينگن موتر نشانگه آلينگن.

احمدي جنابلري شونينگ ديك، مذكور واقعه ده موترده گي لردن اوچته سي هلاك بولگن و ييتي نفري يره لنگن دييدي.

غزني معاوني نينگ ايتيشيچه، يره لنگنلردن ايكيته سي نينگ احوالي آغير بوليب، مركزگه ييتكزيلگن.

بيرلشگن ملتلر تشكيلاتي نینگ بوندن آلتي آي آلدين نشر ايتگن گزارشيگه كوره، افغانستان ده اينگ كوپ تلفاتلر يول چيككه سيگه اورنه تيلگن ماينلردن كيليب چيقه دي.

حادثه مسووليتي ني حاضرگچه هيچ بير گروه اوز بوينيگه آلمه گن.

افغانستان جنوبي ده گي غزني ولايتي مملكت نينگ ناتينچ ولايتلردن سنه له دي.

بوندن ييگيرمه كون آلدين طالبان گروهي بير 15 يشر اوسمير باله ني پوليسگه همكارليك قيلگنليكده عيبلب، قتل ايتگن ايدي.