هراتده محبوسلر نينگ آچيليك اعلاني ييتينچي كونگه ييتدي

افغانستان غربي حدوديده جايلشگن هراتده ايكي مينگگه يقين محبوس لرنينگ آچليك اعلاني يتينچي كونگه ييتدي.

اوشبو آچليك اعلاني اوتگن هفته يكشنبه كوني، 300 محبوس تمانيدن باشلندي. ايكي كون اوتگندن كيين، 1461 محبوس اولرگه قوشيليب، چهارشنبه كوني قماقخانه نينگ باشقه بيرقبتيده گي محبوس لرهم آچليك اعلان قيليب، اولرنينگ ساني 2 مينگگه ييتدي.

آچليك اعلان ايتگن محبوسلرني جنايي همده دولتگه قرشي تورگن بيرگروه عصيانچيلردن تشكيل ايته دي.

آچليك اعلان ايتگنلردن، بيرتعداد محبوسلر جزا بوييچه قماق جزالري مدتي كمه يتيريليشي جمهورليك رييسليك اداره سي تمانيدن هيات صفتيده هرات گه بارگن شخصلرگه تكليف ايتيشگن.

افغانستان جمهور رييسليك اداره سي ملي ومذهبي مناسبت لرده بيرقطار محبوسلرگه قوييگن جزالرني كمه يتيش اوچون فرمان صادر ايته دي.اما ایچکی وتشقی ملی خوف سیزلیککه قرشی جنایتگه قولگن اورگن همده مخدرماده لر قاچاقيده عیبدارتانیلگن شخصلر عفو قيلينمه يدي.

هرات قماقخانه سيده گي محبوسلر،افغانستان جمهوررييسليك اداره سي تمانيدن صلاحيتلي هيات اولر بيلن مذاكره اوتكزمه گن تقديرده، آچليك اعلان ايتيشدن باش تارتمسليكلري باره سيده آگاه لنتيريشگن.

هرات محل رسميلري نينگ ايتيشيچه، بومساله اوچون تيزليكده كابلدن هيات كيليشيني طلب قيليشگن، ليكن هنوزگچه هيات ييتيب بارمه گن.

هرات حاكمي سيد فضل الله وحيديگه كوره، اوشبوولايت محكمه سي قانون بوييچه اوزايشلريني عملي ايتگن، همده جرم وجنايتلریني كمه يتيريش ايسه فقط جمهوررييس گه تيگيشلي.

ولايت كينگش نظارت كميته سي مسوولي تورمحمد ظريفي نينگ ايتيشيچه، بو قضيه ني انيق تيكشيريش اوچون مركزخادملري نينگ هرات گه تيزده كيليشلريني سوره گن:"هيات لرانيق ايشلريني عملي قيليشلري كيره ك، اما نمايشي ايمس. كوپ هيات لركيليشدي، ساعتلب هرات حاكمي همده محكمه لر ريسلري بيلن بيرگه ليكده صحبتلشديلر. مطبوعات گه خبربيرديلر" وكيتديلر".

هرات ولايت كينگشي اوتگن هفته آچليك اعلان ايتگن لر وضعتيني آغيرديب خبربيردي.

اوشبوكينگش قضيه تيزليكده حل ايتيشيني سوره دي، اولرنينگ ايتيشيچه بيرتعداد محبوسلر وضعيتي جوده آغير.

هرات قماقخانه سيده حاضرگي كونده 3200 دن آرتيق محبوس كون كيچيرماقده.