تخار ده قیشلاق لرنی رواجنلتیریش کینگش رئیسلریدن بیری ترور ایتیلدی

تخار مرکزی تالقان شهریگه تیگیشلی سرای سنگ منطقه سی نینگ قیشلاق لرنی رواجنلتیریش باشلیغی، رئیس نجیب شهردن اوییگه قره ب کیته یاتگن بیرپیت قوراللی لر تمانیدن هجومگه توتیلیب ایککی قوریقچسی بیلن هلاک ایتیلگن.

تخارولایتی نینگ پلیس اداره سی سوزچیسی، خلیل الله حسیب بی بی سی بیلن بولگن صحبتیده، رئیس نجیب نینگ باشقه بیر قوریقچی سی هم مذکور حادثه ده یره لنگنینی ایتدی.

معلومات لرگه کوره اوشبو حادثه بوگون ساعت اون بیر اطرافیده تالقان شهری یقینیده جایلشگن چقور اریق منطقه سیده یوزبیرگن.

رئیس نجیب تخار مرکزیگه تیگیشلی سرای سنگ محله سی نینگ قیشلاق لرنی رواجلنتیریش کینگش رئیسی صفتیده وظیفه آلیب باررایکن.

سرای سنگ محله سی، تالقان شهریدن قریب بیش کیلومتر مسافه سی بار. اوشبو منطقه ده عصیانچیلر هم فعال بولمه گنی ایتیله دی.

تخار پلیس اداره سی سوزچیسی گه کوره، رئیس نجیب کیم تمانیدن ترور ایتیلگنی حاضرگه قدرهم معلوم ایمس، اما حادثه یوزه سیدن تیکشیروو ایشلری باشلنگن.

عین حالده حسیب جنابلری، ترور ایتیلگن رئیس نجیب الله نینگ آلدین دن قنده ی دیر سیاسی گروه گه علاقه سی بولمه گنینی تاکیدله دی.