اشرف غني احمدزي، سروراحمدزي و زلمی رسول سيلاولرده اسملريني يازيب قالديردي

اشرف غني احمدزي جنرال دوستم ني بيرينچي معاون وسرور دانش ني ايكنيچي معاون صفتيده سيلاولر مستقل كميسيوني ده قيد ايتدي.

اشرف غني احمدزي و سروراحمدزي كيله سي جمهور رييسليك سيلاولريده اوزنامزدليكلريني سيلاولر كميسيونيده رويخط دن اوتكزيشدي.

ايكله احمدزيلر 1388 ييلده گي جمهور ريسليك سيلاولريده نامزد ايديلر، اما موفقيتليككه ايريشه آلمه دي.

ايتيليشيچه، بيرقطار دولت يوقاري مرتبه لي رسميلري جمله دن جمهور رييس كرزي و اونينگ ايكينچي معاوني كريم خليلي اشرف غني احمدزي نامزدليگي ني حمايه ايتيشگن.

تحليلچيلرنينگ فكريگه كوره، بوندن آلدينراق اوز نامزدليگيني ايلگري سورگن ملي ايتلاف رهبري عبدالله عبدالله، سيلاولرده اشرف غني نينگ يگانه رقيبي بوليشي ممكن.

اشرف غني احمدزي پشتون قوميدن، عبدالرشيد دوستم اوزبيك و سرور دانش ايسه هزاره دير. كورينيشيچه، سيلاولر بو نامزدي مذكور اوچله قوم نينگ آوازلريني قولگه كيريتيشي ممكن.

اشرف غني احمدزي ييللر آلدين امريكاده كون كيچريب كيلگن، بيليم يورت استادي همده دنيا بانكيده ايشله گن. او اوتيش دور حكومتده ماليه وزيري ايدي. كيينگي ييللرده ايسه خوفسيزليك مسووليتلرني تاپشيريش كميسيوني رييسليگي ني باشقرردي.

احمدزي جنابلريدن بير كون آلدين اونينگ اوكه سي حشمت غني احمدزي هم اوز نامزدليگي ايلگري سوردي، شو بيلن ايكله ايناغه رقابت گه چيقيشه دي.

اشراف غني احمدزي، اوتگن هفته جمهور رييسليك سيلاولريده قتنه شيش مقصديده خوفسيزليك مسووليتلرني تاپشيريش كميسيوني رييسليگي ني استعفا بيردي. شونينگ ديك، جنرال عبدالرشيد دوستم هم مملكت قوراللي كوچلري اعلي قوماندانليگي لوازميدن استعفا گه چيقدي.

بوندن آلدين سابق مدافعه وزير عبدالرحيم وردك، سيداسحاق گيلاني، قطب الدين هلال، دل آقا كوهدامني، داكتر عبدالله عبدالله، عبدالرب رسول سياف، بسم الله شير، فضل كريم نجيمي هم اوزلريني رويخط دن اوتكزدي.

ايتيليشيچه، بوگون نينگ اوزيده زلمي رسول ملي جبهه رييسي احمد ضيا مسعود ني بيرينچي معاون و باميان واليسي حبيبه سرابي ني ايكينچي معاون صفتيده تنلب كميسيونده رويخطدن اوتگن.

شونينگديك، حميدالله قادري و سردارمحمد نادر نعيم لرهم سيلاولر مستقل كميسيونيده اسملريني يازيشگنلر.

بو رويخط ده حميدالله قادري حميرا حقمل و محمد عارف بره كي لر ني معاون صفتيده تنله گن و سردارمحمد عارف نعيم ايسه تاج محمد اكبر و عزيزالله پويالرني معاونلري صفتيده اسملريني سيلاولر مستقل كميسيونيده قيد ايتيشگن.

خبرلرگه كوره، توشدن كيين جمهور رييس كرزي نينگ اوكه سي قيوم كرزي هم معاونلريني تنلب، اوزنامزدليگي ني ايلگري سوريش اوچون رويخطدن اوتيشي ممكن.

عين حالده، افغانستان كانلر وزيري وحيدالله شهراني، تجارت وزيري انورالحق احدي، اداري فساد گه قرشي عالي اداره رييسي عزيزالله لودين و دولت يوقاري وزيري هدايت امين ارسلالر هم سيلاولرده قتنه شيش مقصديده اوز رسمي وظيفه لريدن استعفا بيريشگني ايتيله دي.

جمهور رييسليك و ولايت كينگش سيلاولري جاري ييل 25 سنبله دن باشلندي، بوگون 14 ميزانده اوز نهايه سيگه ييته دي.