جنرال دوستم نينگ عذر سوره شي، افغانستان سياستيده بيرينچي تدبير

جنرال دوستم، بير بيانات ترقه تيب، افغانستانده اوتگن ايكي دهه جريانيده روي بيرگن ايچكي اوروشلرده ضررلنگنلردن عذر سوره گن.

جنرال دوستم نينگ افغانستان اهاليسيدن عذر سوره شي و اونينگ ايچكي اوروشلرده گي رولي، مملكت اهاليسي و سياستچيلري ارا ينگي مناسبات ايشيگيني آچيشگه سبب بوليشي ممكن.

اونينگ حاضرگي زمانده اهالي دن عذر سوره ياتگني، بيواسطه كريب كيله ياتگن جمهور رييسليك سيلاولرگه باغليق ايكني امكاندن اوزاق ايمس. چونكه او جمهور رييسليك سيلاولريده اشراف غني احمدزي نينگ بيرينچي معاوني صفتيده افغانلرنينگ حمايه و آوازلريگه احتياجي بار.

جنرال دوستم نينگ همه دن مقدم عذر سوره گني و باشقه لرني عذر سوره شگه چقيرگني، بير مهم مسله ني انگلته دي، و او شوكه افغانلر ايشانچيني مملكت سياستچيلري اهميتيگه قره ته دي. بو افغانلردن بيرقطار ايچكي اوروشلرده حق حقوقلري اياق آستي قيلينگنلر جمله سيدن دير.

دوستم نينگ افغانلردن عذر سوره شي، افغانستانده اوتگن اوچ دهه ايچيده قربان بولگنلرنينگ انساني موقعي گه حرمت قايل بوليش ني كورسته دي.

بو مسله ايسه، عدالت اوتيش دوري ده اوزيگه كته اهميتگه ايگه. قربانلردن عذر سوره ش، درحقيقت عادي اهاليگه قدريت بيريش واولرنينگ كته سياسي و اقتصادي معامله لرده اونوتيمله گني ني انگله ته دي.

افغانستانده گي ايچكي اوروشلرده قطار شخصلر دخيلدار ايديلر، اما حاضرگه قدر فقط جنرال دوستم اوروشلر توغريسيده غذر سوره گن خلاص.

بحران قيته روي بيرمسليگي

تجربه كورسته كه اوروش روي بيرگن ملكتلرده اوروش دن كيين اوتيش دور عملده جاري قيلينيب، قربان لردن عذر سوره ش و اولرنينگ قيغولريگه شيريك بوليش و بحران قيته دن يوز بيرمسليك، فايده لي تمام بوله دي.

جنرال دوستم هم اوروش قربانلريدن عذر سوره گن، اما اونينگ عذرسوره شي افغانستان ني بحران دن دموكراسيگه تمان يولگه آليشيگه باشقره آله ديمي يوق مي، معلوم ايمس.

جنرال دوستم شبهه سيز بو يولده بيرينچي آديم ني قوييگن، اما موفقيتليك ني كيينگي قدملرگه كوريش ممكن. يعني كيينگي آديم قربان بولگن افغانلرگه باغليق.