افغان ـ تاجيك حوزه سيده گي نفت ذخيره لري اوستيده شرطنامه امضالندي

Image caption بو نفت حوزه سي، آمودريا نفت حوزه سيدن كيين ايكينچي اينگ كته نفت حوزه سي حسابلنه دي.

شمالي مزارشريفده ايكينچي اينگ كته افغان ـ تاجك جفرافيه وي نفت حوزه سي قه زيب چيقه ريش شرطنامه سي افغانستان كانلر وزيرليگي و ايكي خارجي و بير افغاني نفت شركتلري بيلن امضالنگن. رسميلر، مذكور حوزه نفت ذخيره لريني قه زيب چيقه ريش بيش ييل اوليده 6.1 ميليارد دالر سرمايه ياتقيزيله دي و 12 مينگ نفر اوچون ايش زميه سي مهيا ايتيله دي.

بو نفت حوزه سي، آمودريا نفت حوزه سيدن كيين ايكينچي اينگ كته نفت حوزه سي حسابلنه دي.

شبرغان حدودي بيرقسمي دن تخارچيگره حدودلريگچه سنه لميش افغان تاجيك حوزه سيده گي نفت ذخيره گاه لري ني قه زيب چيقه ريش شرطنامه سي بوگون توركيه تي پي اي او ملي نفت شركتي، بيرلشگن عرب اميرليگي نينگ تراگن آويل و افغانستان خصوصي غضنفر گروپ شركتي بيلن امضالندي.

بو شرطنامه ده مذكور حوزه ده گي اون ايكي بلاك دن ايكي بلاگي ده گي نفت لر قه زيب چيقه ريليشي امضالندي.

افغانستان كانلروزيرليگي رسميلري مذكور حوزه نينگ نفت ذخيره گاه لريني قه زيب چيقه ريشده كته مبلغ سرمايه ياتقيزيليشي ممنليگي ني تاكيدلشماقده. كانلروزيرليگي پطروليم باش اداره سي رييسي جليل احمد جمراني:"بو شركتلر 25 ييل ايچيده 12 ميليارد دالر سرمايه ياتقيزيشلري كيره ك.بوندن تشقري 12 مينگ آدم نفت قودوقلري اوستيده ايشلشه دي.اولر هم ايش زمينه سي مهيا ايتيله دي. ايشچيلردن باشقه خوفسيزليك خادملري هم خوفسيزليك ني تامينلش اوچون وظيفه دار ايتيليشي ممكن".

عين حالده، توركيه ملي نفت شركتي معاوني، مذكور پروژه لرشرطنامه سي توركيه وافغانستان ارا دوستليك ني تاباره مستحكملب، افغانستان اقتصادي رواجلنيشي اوچون سعي و حركت قيليشي ني تاكيدله دي:"بو پروژه افغانستان وتوركيه اره سيده گي دوستليك ني كوچه يتيره دي. بوندن كيين هم افغانستان ده گي لايحه لرده ايشلشگه حركت قيليشيميز ممكن".

كانلر وزيرليگي رسميلري، مذكور ايكي بلاك ده 514 ميليون بيرل نفت و 91 متر مكعب طبيعي گاز موجود بوليب، شرطنامه مدتي 32 ايكني ني معلوم قيليشدي.

اولرنينگ شونينگ ديك، بو پروژه عملگه آشيريلگن حالده، تورت ييلدن كيين افغانستان منطقه ده نفت وارد قيله ديگن ايمس، بلكه صادر قيله ديگن بيرمملكت گه ايله نيب قاليشي دن بشارت بيريشدي.

افغان ـ تاجيك نفت حوزه سي شرطنامه سي، خلق ارا شفافيت كميته سي نظارتي آستيده امضالندي. ايتيليشيچه، اوشبو كميته شرطنامه امضاله گن شركتلرنينگ نفت قه زيب چيقه ريش جرياني و نفت صفتي باره سيده افغانستان دولتي گه معلومات بيريب توره دي.

بوندن آلدين هم آمو دريا حوزه سيده گي نفت ذخيره لريني قه زيب شرطنامه سي، چين مملكتي نفت شركتلريدن بيري بيلن امضالندي.