افغانستانده سونگي بير نيچه ييل ايچيده قالين بازاري سسته يگن

افغانستان تجارت وصنعت وزيرليگي نينگ ايتشيچه، اوتگن آلتي ييل ايچيده افغانستان قالينلري نينگ تشقي مملكت لرگه صادرايتيليشي جرياني سسته يگن.

غرب بازارلري نينگ اقتصادي يمانلشيب باره گني همده افغانستان هم چيگيره لري نينگ رقابتي عكسل العمل لري بووضعيتدن چيقيش نيتيده، اوشبووزيرليك اوچ ييلليك ايش پلانيني وضع ايتگني ايتلماقده.

قالين توقيش صنعتي، چاروادارچيليكدن كيين، افغانستانده ايكينچي اورين ني ايگلله گن. ليكن تجارت وزيرليگي نينگ ايتشيچه، اوتگن آلتي ييل ايچيده بوصنعت افغانستانده سسته يب قالگن.

بو وزيرليك اوچ ييلليك ايش بيلن تامينلش ريجه سيني اعلام ايتگن، بو لايحه عملي بوليشي بيلن قالين صادرقيليش ميزاني آشيشي ممكنليگي ني تاكيدله دي:"بيز قالين صنعت چيلري نينگ قيين چيليك لريني نظرگه توتيشيميز كيره كليگي خلاصه گه كيلديك، سيزگه تكرارقيليب ايته من كه بحث ميزده ترانسپورت، خام اشيا تيارلش، قرضه همده مالي قيين چيليكلرني محاكمه قيلديك.قوشني لر بيلن قالين صنعتي رواجلنيشي اوچون رقابتگه توشيشيميز كيره ك".

ليكن قالين صنعتي فعاللري خوشبينليك همده تشويشلرباره سيده گپيرماقده لر.

دولت رسميلري نينگ ايتشيچه، بولايحه تامينات همده ترانسپورت، بازارتاپيش، خام اشيا تيارلش وايش بيلن تامين لشگه امكانيت يره تيليشي ممكن.

قالين صادراتلريگه كوره، 2007 ييلدن تا 2012 ييلگه قدر80 فايز سسته يگن. 2007 ييلده 50 ميليون دالر2012 ييلده ايسه 262 مليون دالر يعني صادرايتيش اداره سي نينگ احصاييه مركزي گه كوره، عمومي ساتيلگن قالين لرمملكت ايچكريسيده بولگن.

افغان رسميلريگه كوره، افغانستانده بيرمليون افغان قالين توقيش صنعتي بيلن بند. افغانستانده قالين لرقوريق ميوه دن كيين ايكنيچي اورنيني صادرايتيشده ايگلله گن.

حاضرگي كونده افغانستان قالينلري نينگ سككسن فايزي پاكستان آرقه لي صادرايتيله دي. پاكستانده افغانستان قالينلري پاكستان موري باسيليب اوشبومملكت ناميگه خارجگه صادرايتيله دي. افغان تاجرلري نينگ اصلي صادرايتيش بازاري پاكستاندن كيين، توركيه، هند، بيرلشگن عرب اميرليگي، روسيه، آلمان وامريكا مملكت لري تشكيل بيره دي